ኢትዮጵያ አሰብ፣ አዱሊስ፣ ገምበዛ፣ ዘይላ እና ምጽዋ የተሰኙ የቀይ ባሕር ወደቦች እንደነበሯት የታሪክ መረጃዎች ያሳያሉ። በታሪክ በተፈጠሩ እጥፋቶች እና በፖለቲካ ሴራ ግን ከቀይ ባሕር ቀጣና ርቃ ቆይታለች። ከባሕር በር መገለሏ ደግሞ በየዓመቱ ረብጣ ገንዘብ ለወደብ ኪራይ እንድትከፍል አድርጓታል።
ከወደብ መገለሏ የባሕር ኀይሏን አፍርሷል። በሥራ ዕድል ፈጠራ፣ በኢኮኖሚ ተጠቃሚነት፣ በሀገሪቱ የዕድገት ግስጋሴ ላይ ማነቆም ፈጥሮ ቆይቷል።
ያዕቆብ ኀይለማርያም (ዶ.ር) “አሰብ የማን ናት” በሚለው መጽሐፋቸው በወቅቱ ሀገሪቱን ያሥተዳድር የነበረው ሥርዓት”ወደብ ለዕድገት አስፈላጊ አይደለም፣ ወደብ ማጣት አይጎዳንም” በማለት በፖለቲካዊ ሤራ ኢትዮጵያ ከባሕር በር እንድትገለል ማድረጋቸውን አትተዋል።
በወቅቱ የነበረው ሥርዓት” አሰብን ወደ ኢትዮጵያ እንመልስ ማለት ከኢትዮጵያ መንግሥት እምነት እና መርሕ ውጭ ነው” በማለት በኢትዮጵያ ሕዝብ ላይ ታሪክ ይቅር የማይለው በደል መፈጸሙ በመጽሐፉ ተጠቅሷል።
በታሪክ ኢትዮጵያን ለማዳከም የመጡ ታሪካዊ ጠላቶች ቀይ ባሕርን በመጠቀም ጥቃት ይፈጽሙ እንደነበር በመጽሐፉ ተቀምጧል።
የባሕር በር ምን ጠቀሜታ አለው? የባሕር በር መኖር የውጭ ኢንቨስተሮች በሀገሪቱ የምርት እና የንግድ ሥራ ላይ እንዲሳተፉ፣ ለበርካታ ወጣቶች የሥራ ዕድል እንዲፈጠር፣ የሀገር ወታደራዊ ምስጢር እንዲጠበቅ፣ የሀገር ሰላም እና ደኅንነት አሥተማማኝ እንዲኾን ያስችላል።የሽብርተኞችን እና የጠላትን እንቅስቃሴ ለመቆጣጠር ያግዛል። የወጭ እና የገቢ ንግድ እንቅስቃሴን ያሳልጣል፣ በየዓመቱ ለወደብ ኪራይ የሚወጣን ወጭ በማስቀረት መሠረተ ልማት ላይ እንዲውል ያስችላል፣ የማኅበረሰቡ ኑሮ እንዲሻሻልም ያደርጋል።
የመንግሥት የቀጣይ የትኩረት አቅጣጫ ቀይ ባሕር። ጠቅላይ ሚኒስትር ዐቢይ አሕመድ (ዶ.ር) በቅርቡ ባደረጉት ንግግር ምሥራቅ አፍሪካ፣ ቀይ ባሕር እና የሕንድ ውቅያኖስ በሚገናኙበት ልዩ ስፍራ ላይ መቀመጥ ፈተናም ዕድልም አለው ብለዋል። ፈለግንም አልፈለግንም የዚህ አካባቢ ለውጥ እኛንም ይጎበኘናል፣ ለዚህም ታሪክ ምስክር መኾኑን ጠቅሰዋል።የባሕር በር ተጋሪነታችን የተለወጠው፣ የተጽዕኖ አድማሳችን ሲኮሰምን የኖረው ፈልገን ብቻ አይደለም፤ ተገደን ጭምር ነው ብለዋል። አቅም በነበረን ወቅት የራሳችንን ጉዳይ ራሳችን ወስነናል፣ በተዳከምን ጊዜ ግን ሌሎች በእኛ ላይ ወስነውብናል ነው ያሉት።
የኢትዮጵያ ሥልጣኔ ያለ ባሕር በር እውን ሊኾን አይችልምና በሰጥቶ መቀበል መርሕ ኢትዮጵያ ወጥቶ መግቢያ በር እንዲኖራት ተግተን እንሠራለን ብለዋል።
ዘጋቢ:- ያየህ ፈንቴየአሚኮ ዲጂታል ሚዲያ ቤተሰብ ይሁኑ!
