የሕዝብ ተወካዮች ምክር ቤት እና የፌዴሬሽን ምክር ቤት የጋራ ሥብሠባ ተካሂዷል። በሁለቱ ምክር ቤቶች የጋራ ሥብሠባ የመክፈቻ መርሐ ግብር ላይ የኢፌዴሪ ፕሬዝዳንት ታዬ አጽቀሥላሴ ንግግር አድርገዋል።
ፕሬዝዳንቱ በንግግራቸው ካነሷቸው ዋና ዋና ጉዳዮች መካከል:-
በ2018 የምርት ዘመን ከሰባት ዓመት በፊት ከነበረው 335 ሚሊዮን ኩንታል ዓመታዊ የሰብል ምርት ስብሰባ ወደ 1 ነጥብ 3 ቢሊዮን ኩንታል መድረሱ የለውጡ ግስጋሴ ታላቅ መገለጫ ነው ብለዋል።በሰባት ዓመት ውስጥ 1 ቢሊዮን ኩንታል የሰብል ምርት መጨመር ታላቅ እመርታ ብቻ ሳይኾን ታላቅ ልዕልና ስለኾነ ሊሞገስ ይገባዋል ነው ያሉት።
የወጭ ንግድ ገቢ በሀገራችን ታሪክ ለመጀመሪያ ጊዜ 11 ነጥብ 2 ቢሊዮን ዶላር ማስመዝገብ መቻሉንም አንስተዋል። የውጭ ቀጥተኛ ኢንቨስትመንት 4 ነጥብ 5 ቢሊዮን ዶላር መድረሱ፤ የአምራች ኢንዱስትሪ ዕድገት 15 ነጥብ 8 በመቶ ከፍ ማለቱ፤ የብድር አቅርቦት ወደ 1 ነጥብ 3 ትሪሊዮን ማደጉ፤ የዋጋ ግሽበትን በግንቦት ወር 2018 ዓ.ም ወደ 13 ነጥብ 4 በመቶ ዝቅ ማድረግ መቻሉ እና ጠቅላላ የሀገር ውስጥ ገቢ 1 ትሪሊዮን 980 ቢሊዮን ብር መድረሱ ታላቅ ስኬቶች መኾናቸውን ተናግረዋል።ውጤቱ የበርካታ ሰዎች ሃሳብ፣ ዕውቀት፣ ላብ እና ጉልበትን የጠየቀ መኾኑንም ተናግረዋል። በዚህ የላቀ ውጤት ለተጉ በሙሉ ምስጋናም አቅርበዋል።
ውጤቱ በውጫዊ እና በውስጣዊ ጫና እያለፍን የተመዘገበ ነው ሲሉም ገልጸዋል። ኢትዮጵያ ያቀደችው እድገት ፈተናዎችን የሚቋቋም ብቻ ሳይኾን የኢኮኖሚ ሉዓላዊነትን ለማረጋገጥ ለሚደረገው ሁለገብ ጥረት ተጨማሪ ብልሃት እና አቅም መኾን መቻሉ ነው ብለዋል።
መንግሥት የኢትዮጵያን ዘላቂ ብሔራዊ ጥቅሞች ለማስጠበቅ ሁሉንም የጥንካሬ አቅሞች በማደራጀት የሀገርን እድገት እና ብልጽግና ለማፋጠን የሚያስችሉ ተግባራትን በማከናወን ላይ ይገኛል ነው ያሉት።
ዘጋቢ፦ ያየህ ፈንቴ
የአሚኮ ዲጂታል ሚዲያ ቤተሰብ ይሁኑ
