“የባሕር በር ጥያቄን መከልከል አይቻልም”

በዓለም አቀፍ ሕግ መሠረት የባሕር በር የሌላቸው ሀገራት የባሕር በር የማግኘት ሕጋዊ መብት አላቸው። የፖለቲካ ሳይንስ እና ዓለም አቀፍ ግንኙነት ምሁሩ ፕሮፌሰር ብሩክ ኀይሉ የባሕር ጠረፍ ያላቸው ሀገራት የባሕር በር የሌላቸውን ወንድም ሀገራት የመጠቀም መብት ሊከለክሉ አይችሉም ብለዋል።

ይህን ማድረግም በቀጥታ ዓለም አቀፍ ሕግን መጣስ እንደኾነ ነው የተናገሩት። በዚህም መሠረት እንደ ኤርትራ ያሉ የባሕር ጠረፍ ያላቸው የጎረቤት ሀገራት በፖለቲካዊ አለመግባባቶች ምክንያት ብቻ የኢትዮጵያን ሕጋዊ የባሕር በር ጥያቄ እና ፍላጎት ሊከለክሉ እንደማይችሉ አጽንኦት ሰጥተው ገልጸዋል።

የባሕር በር እና የኢትዮጵያ ብሔራዊ ጥቅም እንደ ምሁሩ ማብራሪያ የባሕር በር ማግኘት ከኢትዮጵያ ብሔራዊ ጥቅም ጋር በቀጥታ የተሳሰረ ነው። ብሔራዊ ጥቅም ማለት ደግሞ በሀገር ውስጥ ሰላም እና ደኅንነትን ማረጋገጥ፤ የኢኮኖሚ እድገትን ማፋጠን፤ የሥራ ዕድል መፍጠር፤ የምግብ ዋስትናን ማረጋገጥ እና የተፈጥሮ ሚዛንን መጠበቅ ናቸው ብለዋል።

የሀገሪቱ የኢኮኖሚ እድገት ሲፋጠን የኢትዮጵያ የወጪ እና ገቢ ንግድ በከፍተኛ ሁኔታ ይጨምራል። ይህ ደግሞ ሀገሪቱ የራሷን የወደብ መሠረተ ልማት እንድትገነባ እና እንድታስፋፋ ዕድል ይሰጣል ነው ያሉት።

የባሕር በር ማጣት የሚያስከትለው የሕልውና እና የሥነ-ልቦና ስጋት የባሕር በር ማግኘት ለአንዲት ሀገር የሕልውና እና የሕይወት ቀጣይነት መረጋገጥ ወሳኝ ጉዳይ ነው። በዓለም ባንክ እና በዓለም አቀፉ የገንዘብ ድርጅት (IMF) ጥናቶች መሠረት የባሕር በር የሌላቸው ሀገራት በወጪ እና ገቢ ንግድ ሂደት በሚባክኑ ቀናት እና ሳምንታት ምክንያት ከፍተኛ የገንዘብ እና የጊዜ ብክነት ይደርስባቸዋል።

ይህ ሁኔታ በሕዝቡ እና በመንግሥት ላይ ትልቅ የሥነ-ልቦና ጫና፣ የደኅንነት ስጋት፣ የሀገሪቱ የወደፊት ሕልውና በሌሎች ሀገራት እጅ የመውደቅ ስጋት እንደሚፈጥር ፕሮፌሰሩ አንስተዋል።

የመፍትሔ አቅጣጫ የባሕር ጠረፍ ያላቸው ማለትም እንደ ኤርትራ ያሉ ሀገራት ለራሳቸው እና ለልጅ ልጆቻቸው ብሩህ ተስፋ ሲሉ በቅንነት የኢትዮጵያን የባሕር በር ጥያቄ ማዳመጥ እና ለጋራ ተጠቃሚነት መፍቀድ እንዳለባቸው ገልጸዋል።

#ትልቅ_ሀገር #ትልቅ_ሕዝብ #ታላቅ_ርዕይ

#ባሕር_ዳር #መስከረም-20_2019_ዓ_ም

ዘጋቢ፦ ቴዎድሮስ ደሴ

የአሚኮ ዲጂታል ቤተሰብ ይሁኑ!