በጎንደር ከተማ ዓለም አቀፍ የቱሪዝም ቀን አስመልክቶ የቱሪዝም ሚኒስትር ሰላማዊት ካሳ በተገኙበት የቱሪዝም ሥፍራዎች የጉብኝት መርሐግብር ተካሂዷል።
በመርሐግብሩ ላይ ባለፈው ዓመት ከ 1 ነጥብ 6 ሚሊዮን በላይ የውጭ ዜጎች ኢትዮጵያን ጎብኝተዋል ያሉት የቱሪዝም ሚኒስትሯ ሰላማዊት ካሳ መንግሥት ለዘርፉ ትኩረት ሰጥቶ በመሥራቱ 5 ቢሊዮን ዶላር ገቢ መገኘቱን አንስተዋል።
አሠራርን በማዘመን የሀገር ውስጥ ቱሪዝምን ማበረታታት እንደሚገባም አንስተዋል። ክልሎች ለዘርፉ ትኩረት ሰጥተው እንዲሠሩ መደረጉንም አመላክተዋል።
ባለፈው ዓመት ከ800 በላይ የቱሪስት መዳረሻዎች ልየታ እንደተደረገም ጠቁመዋል።
ጎብኝዎች ደኅንነታቸው ተጠብቆ የቆይታ ጊዜያቸውን በጥሩ ሁኔታ እንዲያሳልፉ እየተሠራ መኾኑንም ገልጸዋል።
የቱሪዝም ቀን በጎንደር መከበሩ ትልቅ ጠቀሜታ እንዳለው ያነሱት የጎንደር ከተማ አሥተዳደር ተቀዳሚ ምክትል ከንቲባ ቻላቸው ዳኘው ጎንደር የበርካታ ታሪካዊ ቅርሶች መገኛ ናት ብለዋል።
የፋሲል ቤተመንግሥት ለቱሪስቶች ቀዳሚ መዳረሻ መኾኑንም ገልጸዋል። በርካታ ቱሪስቶች ወደ ከተማዋ መምጣታቸውንም አንስተዋል።
ለቱሪዝም ምቹ ሁኔታን በመፍጠር ከዘርፉ የሚገኝን ተጠቃሚነት ከፍ ለማድረግ ይሠራልም ነው ያሉት።
በጉብኝቱ አሚኮ ያገኛቸው ከተለያዩ ክልሎች የመጡ የሥራ ኀላፊዎች ቅርሶች ታሪካዊ ይዘታቸውን ጠብቀው መታደሳቸው ይበልጥ የቱሪስት ፍሰትን የሚጨምር ነውም ብለዋል።
#አሚኮ #መስቀል #ኢትዮጵያ🇪🇹
#ጎንደር #መስከረም_17_2019_ዓ_ም
ዘጋቢ፦ አምሳሉ አደራጀው
የአሚኮ ዲጂታል ሚዲያ ቤተሰብ ይሁኑ!
