🇪🇹 “ሀገር ከሁሉም በላይ ናት”

አንዲት ሀገር የቱንም ያህል የተፈጥሮ ሀብት ቢኖራት፣ የሠራዊት ቁጥሯ ቢበዛ፣ በውስጥ ክፍፍል ከተጠቃች እና የጋራ ራዕይ ካጣች ህልውናዋን ማስጠበቅ ያዳግታታል። በደብረ ብርሃን ዩኒቨርሲቲ የፖለቲካ ፍልስፍና መምህር ከኾኑት ሀሳቡ ተስፋ ጋር ያደረግነው ቆይታ የሚያነሳው ዋና ቁልፍ ጉዳይም ይኸው ነው።

መምህር ሀሳቡ ብሔራዊ ጥቅም የፖለቲካ ቡድኖች ፍላጎት ድምር ውጤት ሳይኾን የአንዲት ሀገር ቋሚ ራዕይ፣ የሕዝቦቿ የጋራ ህልም እና አማካይ ፍላጎት መኾኑን ተናግረዋል።

ብሔራዊ ጥቅምን ለማስከበር እና ህልውናን ለማስጠበቅ ደግሞ አራት ወሳኝ መሰረቶች መሟላት አለባቸው ነው ያሉት።

🔑 ብሔራዊ ጥቅምን ለማስከበር የሚበጁ ብለው ካነሷቸው አራት ቁልፍ ጉዳዮች መካከል የውስጥ አንድነት እና የጋራ ትርክት አንዱ እንደኾነ ነው ያነሱት።

ሕዝብ አንድ የሚኾነው እና በአንድ መርከብ ሊሳፈር የሚችለው ደግሞ የጋራ ዓላማ እና መድረሻ ሲኖረው ነው ብለዋል።

ከፋፋይ ትርክቶችን አስወግዶ የጋራ ትናንት እና ነገን የሚያልም የጋራ ትርክት መገንባት ለብሔራዊ ጥቅም መጠበቅ ቀዳሚው እና ተኪ የሌለው መሳሪያ መኾኑንም ተናግረዋል።

ከኢኮኖሚ ጥገኝነት መላቀቅም ሌላኛው ቁልፍ ጉዳይ መኾኑን ገልጸዋል። በውጭ ሀገራት ድጋፍ እና እጅ መንሻ ላይ የሚኖር ሀገር የፖሊሲ ነፃነት ሊኖረው አይችልም ነው ያሉት።

የውጭ ጫናን በመቋቋም ብሔራዊ ጥቅምን በራስ መንገድ ለማስከበር በራስ አቅም መቆም እና የውስጥ ሀብትን ማጠናከር ወሳኝ ነውም ብለዋል።

ሌላኛው ያነሱት ቁልፍ ጉዳይ የልዩነቶች ቀይ መስመር መኖር ነው። በፖለቲካ ኀይሎች መካከል የሥልጣን ፉክክር እና የአመለካከት ልዩነት መኖሩ ተፈጥሯዊ ነው፤ ነገር ግን ልዩነቶች መስተናገድ ያለባቸው ከሀገር ህልውና እና ከብሔራዊ ጥቅም በመለስ ባለው ሜዳ ላይ ብቻ ነው ብለዋል።

ሀገር ሲኖር ነው መብት የሚጠየቀው ያሉት መምህር ሀሳቡ የሀገርን ህልውና አደጋ ላይ የሚጥል አካሄድ መጨረሻው ሁሉንም ነገር ማጣት እንደኾነ ነው ያስረዱት።

የውጭ ጣልቃ ገብነትን በራስ አቅም መገደብም ሌላው ቁልፍ ጉዳይ እንደኾነ ገልጸዋል። የውጭ ኀይሎች በአንድ ሀገር ውስጥ ጣልቃ የሚገቡት ችግር ለመፍታት ሳይኾን የራሳቸውን ጥቅም ለማስከበር ነውም ብለዋል።

“የጠላቴ ጠላት ወዳጄ ነው” በሚል አጉል ፍልስፍና የውጭ እጆችን መጋበዝ ሀገርን ይበልጥ ወደማይታረቅ ቅራኔ እና ቀውስ ከመክተት ውጭ የሚያመጣው ሰላም የለም ነው ያሉት።

💡ኢትዮጵያ ውስጥ በፖለቲካ እና በሥልጣን ፉክክር ውስጥ ያሉ አካላት ሊረዱት የሚገባው ትልቅ ዕውነት ሀገር ከሁሉም በላይ ናት የሚለውን ጉዳይ እንደኾነ ተናግረዋል።

የውስጥ ልዩነቶችን በውይይት እና በራስ ብልሃት መፍታት ካልተቻለ ለውጭ ጣልቃ ገብነት በር ከፈትን ማለት ነው ብለዋል። ከብሔራዊ ጥቅም በላይ የሚኾን የቡድን አለያም የግል አጀንዳ ሊኖር እንደማይገባም ገልጸዋል።

ሀገር ቀድማ ስትኖር እና ህልውናዋ ሲጠበቅ ብቻ የሁሉም መብት እና ጥቅም ሊከበር እንደሚችልም አስገንዝበዋል።

✍️ የእርስዎ አስተያየት ምንድን ነው? በኢትዮጵያ የጋራ ትርክት ለመገንባት እና የውስጥ አንድነትን ለማጠናከር ከእያንዳንዱ ዜጋ እና የፖለቲካ ኀይል ምን ይጠበቃል? ሃሳብዎን በሃሳብ መስጫ ሳጥን ውስጥ ያካፍሉን! 👇

#AMECO
#Ethiopia #NationalInterest #NationalUnity

#ባሕር_ዳር #ሐምሌ_29_2018_ዓ_ም

✍️ዘጋቢ፦ ሮዛ የሻነህ

የአሚኮ ዲጂታል ሚዲያ ቤተሰብ ይሁኑ!