🗳️ 🇪🇹 ድምጽን ለሀገር ግንባታ፣ አንደበትን ደግሞ ለሰላም ማስፈኛ መጠቀም ይገባል።

ባሕር ዳር፡ ግንቦት 23/2018 ዓ.ም (አሚኮ) ግንቦት 24/2018 ዓ.ም በሚካሄደው 7ኛው ጠቅላላ ምርጫ ለመሳተፍ እና ድምፃቸውን ለመስጠት ሙሉ ዝግጅት ማድረጋቸውን የባሕርዳር ከተማ ነዋሪዎች ለአሚኮ ተናግረዋል። ነዋሪዎቹ የምርጫ ካርዳቸውን አስቀድመው መውሰዳቸውን ገልጸው በዕለቱ ድምጽ ለመስጠት እየተጠባበቁ መኾኑን ጠቁመዋል።

​ምርጫ ለሀገር ግንባታ ያለውን የጎላ ጠቀሜታ በመገንዘብ ካርዳቸውን በጥንቃቄ መያዛቸውን የተናገሩት ነዋሪዎቹ “ይበጀናል” ለሚሉት የፖለቲካ ፓርቲ ድምፃቸውን ለመስጠት መዘጋጀታቸውን ተናግረዋል።

​የምርጫው ሂደት ሰላማዊ፣ ፍትሐዊ እና ዴሞክራሲያዊ እንዲኾን የድርሻቸውን ኀላፊነት እየተወጡ መኾኑንም አብራርተዋል።

የነገዋን ታላቅ ሀገር በተባበረ ክንድ መገንባት ያስፈልጋል፤ ለዚህም በድምፃችን ሀገር እንገነባለን፤ በአንደበታችንም ሰላምን እንዘምራለን ሲሉ ነው የተናገሩት። ድምጽን ለሀገር ግንባታ፣ አንደበትን ደግሞ ለሰላም ማስፈኛ መጠቀም እንደሚገባም ጠቁመዋል።

​በከተማዋ የተጀመሩ የልማት ሥራዎች ተጠናክረው እንዲቀጥሉ እንደሚሹ የገለጹት ነዋሪዎቹ በካርድ ወደ ሥልጣን የሚመጣ አካል አሁን ያለውን ልማት እና የተሻለ ሰላምን እንዲያስቀጥል እንደሚፈልጉ ነው ያስረዱት።

የምርጫው ሂደትም በስኬት እንዲጠናቀቅ ሁሉም የኅብረተሰብ ክፍሎች ኀላፊነታቸውን መወጣት እንደሚገባቸው አስተያየት ሰጥተዋል።

ዘጋቢ፦ ሥራውድንቅ ደሳለው

#አሚኮ_ዜና #7ኛው_ምርጫ_2018_ዓ.ም #ባሕር_ዳር #አማራ_ክልል #ኢትዮጵያ

የአሚኮ ዲጅታል ቤተሰአሚኮ_ዜናብ ይሁኑ !

https://linktr.ee/Amharamediacorporations

ለኅብረተሰብ ለውጥ እንተጋለን !