ሚሊሻ ለክልሉ መረጋጋት እና ሰላም የጀርባ አጥንት ኾኖ አገልግሏል።

በምክትል ርእሰ መሥተዳድር ማዕረግ የከተማ ዘርፍ አስተባባሪ አሕመዲን ሙሐመድ (ዶ.ር) በዓሉ በአርበኞች ቀን መከበሩ የትናንትናውን ታሪካዊ ተጋድሎ ከዛሬው የሰላም ጥረት ጋር የሚያስተሳስር መኾኑን ገልጸዋል። ሚሊሻ ለክልሉ መረጋጋት የጀርባ አጥንት መኾኑንም አንስተዋል።

የአማራ ክልል ሚሊሻ ኮሚሽን ኮሚሽነር አስቻለው አላምሬ ሚሊሻ በአንድ እጁ ማረሻ በሌላኛው እጁ ጠመንጃ ይዞ ሕዝባዊነቱን ያስመሰከረ ኀይል መኾኑን ጠቅሰው መዋቅሩ በኢትዮጵያ ብቻ ሳይኾን በዓለም አቀፍ ደረጃም የሚታወቅ የሰላም አስከባሪ ኀይል መኾኑን አስገንዝበዋል።

የደብረ ብርሃን ከተማ ተቀዳሚ ምክትል ከንቲባ በድሉ ውብሸት በመድረኩ ላይ ባደረጉት ንግግር የሚሊሻ ሠራዊት በሀገር ፍቅር ስሜት እና በፈቃደኝነት ሕዝብን የሚያገለግል፣ ለከተማዋ ሰላም ዋስትና የኾነ የሰላም ዘብ መኾኑን ገልጸው ክብር እንደሚገባው ተናግረዋል።

የሀገር መከላከያ ሠራዊት የልዩ ዘመቻ ምክትል አዛዥ ሜጀር ጄኔራል ከማል ኤጲሶ የሚሊሻን ታሪካዊ ተሳትፎ ሲያብራሩ “ያለ ሚሊሻ የካራማራን ድል ማሰብ አይቻልም” ብለዋል። አሁንም ለሠራዊቱ ዋነኛ አጋር እና የከተሞች የሰላም ዘብ በመኾን እያገለገለ እንደሚገኝ ገልጸው መከላከያ የሚሊሻን አቅም ለመገንባት ዝግጁ መኾኑን አረጋግጠዋል።

በበዓሉ ላይ የኢትዮጵያ መከላከያ ሠራዊት የማርች ቡድን ወታደራዊ ትርዒት በማቅረብ ለበዓሉ ልዩ ድምቀት ሰጥቶታል።

#የሚሊሻ_30ኛ_ዓመት #Ethiopia

የአሚኮ ዲጅታል ቤተሰብ ይሁኑ

ለኅብረተሰብ ለውጥ እንተጋለን !