በደብረ ታቦር ከተማ በቂ የኤሌክትሪክ ኀይል አቅርቦት ባለመኖሩ በኢንዱስትሪ እና ኢንቨስትመንት ዘርፍ የተሠማሩ ባለሀብቶች በዘርፉ ውጤታማ ለመኾን ተቸግረው ነበር።
ከከተማ አሥተዳደሩ ኢንዱስትሪ እና ኢንቨስትመንት መምሪያ የተገኘው መረጃ እንደሚያመላክተው በኤሌክትሪክ ኀይል አቅርቦት ምክንያት ባለሀብቶች ወደ ከተማ ገብተው ለማልማት እንቅፋት ፈጥሮባቸው ቆይቷል።
የደብረ ታቦር ከተማ አሥተዳደር ኢንዱስትሪ እና ኢንቨስትመንት መምሪያ ተወካይ ኀላፊ ዋለ ዓለሙ መንግሥት የኤሌክትሪክ ኀይል አቅርቦት ችግርን በጊዜያዊነት ለመፍታት በሞባይል ሰብስቴሽን አገልግሎት በዘርፉ ለተሠማሩ አልሚዎች ኀይል ሲያቀርብ መቆየቱን ገልጸዋል።
መንግሥት ችግሩን በዘላቂነት ለመፍታት በወሰደው እርምጃ ዘላቂ የኾነ የኀይል አቅርቦት ማከፋፈያ ጣቢያ በመገንባት በከተማዋ በቂ የኀይል አቅርቦት እንዲኖር አድርጓል ብለዋል።
የኀይል አቅርቦት ችግሩ መቀረፉ አልሚ ባለሀብቶች ወደ ሥራ እንዲገቡ አድርጓል ነው ያሉት። የማልማት ፍላጎት ያላቸው አልሚዎች ወደ ከተማው ገብተው እያለሙም ነው።
ኀይልን በወረፉ ይጠቀሙ የነበሩ አልሚዎች አሁን ላይ ሙሉ በሙሉ የኀይል አቅርቦት እያገኙ ነው ብለዋል። በማኑፋክቼሪንግ 97፣ በአገልግሎት ዘርፍ ደግሞ 361 ባለሃብቶች በከተማዋ እያለሙ መሆናቸውን ገልጸዋል።
በማኑፋክቼሪንግ ዘርፍ 61ባለሀብቶች ሙሉ በሙሉ ወደ ሥራ ገብተዋል፤ 15 ባለሀብቶች ደግሞ የምርት ሂደት ላይ ናቸው ብለዋል። ወደ ሥራ ያልገቡ ባለሀብቶች ሥራ እንዲጀምሩም እየተሠራ ነው።
መሬት ተረክበው ወደ ሥራ ያልገቡ 12 ባለሀብቶች ላይ በ2018 በጀት ዓመት በሕግ አግባብ እርምጃ በመውሰድ መሬታቸውን በመንጠቅ ለመሬት ባንክ ገቢ ተደርጓል ነው ያሉት። ለ10 ባለሀብቶች የቃል ማስጠንቀቂያ መሰጠቱንም ተናግረዋል።
በ2019 በጀት ዓመት የከተማው ኢንቨስትመንት እንዲነቃቃ አልሚ ባለሀብቶች ወደ አካባቢው መጥተው እንዲያለሙ ለማድረግ እየተሠራ ነው ብለዋል። በከተማዋ የኀይል አቅርቦት ለአልሚ ባለሀብቶች ፈተና የሚኾንበት ዘመን ማብቃቱንም ገልጸዋል።
#የመደመር_መንግሥት!
#ትልቅ_ሀገር_ትልቅ_ሕዝብ_ታላቅ_ርዕይ!🇪🇹
#ባሕር_ዳር #ኅዳር_05_2019_ዓ_ም
✍️ ዘጋቢ:- ያየህ ፈንቴ
የአሚኮ ዲጂታል ሚዲያ ቤተሰብ ይሁኑ!
