‎🇪🇹 የኅብረተሰቡን እንግልት ያስቀረው የመሶብ አንድ ማዕከል አገልግሎት!

በኢትዮጵያ ባለፉት ዘመናት በአንድ ጉዳይ አገልግሎትን ለማግኘት እና መብትን ለማስከበር የእጅ አዙር ጉዞ መሄድ ባሕል ተደርጎ ቆይቷል። ሙስና እና ብልሹ አሠራርም ተቋማት የመፈጸም አቅማቸው እንዲዳከም አድርጎ ቆይቷል።
‎
‎የዲጂታል ሥርዓትን አለመጠቀም፣ የአገልግሎት እርካታን አለመፍጠር፣ የሕዝብን እንግልት ለግል ኪስ ማድለብያ መጠቀም የተቋማትን የአገልግሎት አሠጣጥ ፈትኖት ነበር።

አንዳንዴም ማኅበረሰቡ “አገልግሎት ለማግኘት በእግር ሳይኾን በእጅ ሂዱ” ሲሉ ማድመጥ የተለመደ ጉዳይ ነው።
‎
‎ብልሹ አሠራር በርካታ መሠረተ ልማቶች እንዲጓተቱ፣ ማኅበራዊ እና ኢኮኖሚያዊ ጫና እንዲፈጠር እና የሀገሪቱ የዕድገት ጉዞ እንዲዳከም አድርጎ መቆየቱ የሚታወስ ነው።

በአንድ ጉዳይ አገልግሎት ለማግኘት ሳምንት እና ወር አልፎ አልፎም ዓመት የሚመላለሱ ግለሰቦችን ማየት የተለመደም ነበር።
‎
‎መንግሥት ችግሩን ለመፍታት ባደረገው የተቋማት ሪፎርም አሁን ላይ ብልሹ አሠራርን የሚሰብር፣ የአገልግሎት ፈላጊውን እንግልት የሚያስቀር፣ ቀልጣፋ እና ፍትሐዊ አሠራርን የሚከተል፣ ቴክኖሎጂን በስፋት የሚጠቀም የመሶብ አንድ ማዕከል አገልግሎት እንዲጀመር አድርጓል።
‎
‎በርካታ ተቋማት በአንድ ማዕከል አገልግሎት እንዲሰጡ በማድረግ የአገልግሎት ቅልጥፍናን መፍጠር ተችሏል።

የተገልጋዮችን እንግልት በመቅረፍም ጊዜ እና ጉልበትን በመቆጠብ በማኅበረሰቡ ላይ የአገልግሎት እርካታን ፈጥሯል። ፋይል ጠፋ፣ ሥብሠባ ላይ ነን የሚሉ ምክንያቶች በመሶብ የአገልግሎት ተቋም ውስጥ የሉም።
‎
‎ማኅበረሰቡ የዲጂታል ቴክኖሎጂን በመጠቀም ወደ ተቋማት መሄድ ሳያስፈልገው ባለበት ኾኖ አገልግሎት ማግኘት የሚችልበት ሥርዓትንም ፈጥሯል።

በኢትዮጵያ በተለያዩ ቦታዎች የመሶብ አንድ ማዕከል አገልግሎት ተቋማት ተገንብተው ለማኅበረሰቡ እርካታን ፈጥረዋል። የመልካም አሥተዳደር ችግሮችንም ቀርፈዋል።
‎
‎የወረቀት አሠራርን አስቀርቶ የዲጂታል ሥርዓትን ገንብቷል። ለሠራተኞች ምቹ የሥራ አካባቢንም ፈጥሯል።
‎
‎ጠቅላይ ሚኒስትር ዐቢይ አሕመድ (ዶ.ር) መሶብ የአንድ ማዕከል አገልግሎት ሕዝብ በአገልግሎት ዙሪያ የሚያሰማውን ምሬት የሚያስቀር ነው ብለዋል። 🤳

የሀገር በቀል የሶፍትዌር ሲስተምን በመጠቀም የበለጸገው ማዕከል ወጣቶች ሥራቸውን ወደው እንዲያገለግሉ የሚያስችል መኾኑንም ተናግረዋል።
‎
‎ሁሉንም አገልግሎቶች በአንድ ማዕከል የሚያገኙበት ድንቅ ሪፎርም ነውም ብለውታል። ብልሹ አሠራርን የሚያስቀር እና ቀልጣፋ አገልግሎትን ለማሳለጥ የሚያግዝ መኾኑንም ገልጸዋል። የመሶብ የአንድ ማዕከል አገልግሎትን በሀገሪቱ ለማስፋት በትኩረት እንደሚሠራም አንስተዋል።
‎
‎በሀገሪቱ በተለያዩ ከተሞች የተጀመረው የመሶብ አገልግሎት በተንቀሳቃሽ የተሽከርካሪ አገልገልግሎት ታግዞ ለማኅበረሰቡ አገልግሎት እየሰጠም ይገኛል።
‎
‎#የመደመር_መንግሥት!
‎
‎#ትልቅ_ሀገር_ትልቅ_ሕዝብ_ታላቅ_ርዕይ!🇪🇹
‎
‎#ባሕር_ዳር #ኅዳር_03_2019_ዓ_ም
‎
‎✍️ ዘጋቢ:- ያየህ ፈንቴ
‎
‎የአሚኮ ዲጂታል ሚዲያ ቤተሰብ ይሁኑ!