የአማራ ክልል ምክትል ርእሰ መሥተዳድር አብዱ ሁሴን (ዶ.ር) የክልሉን የመሠረተ ልማት ዘርፍ 1ኛ ሩብ ዓመት የሥራ አፈጻጸም እና የቀጣይ አቅጣጫ ላይ ውይይት አካሂደዋል።
ምክትል ርእሰ መሥተዳድር አብዱ ሁሴን (ዶ.ር) የመሠረተ ልማት ሥራዎች የሕዝብን ሕይወት በቀጥታ የሚደጉሙ ተግባራት የሚከወንበት መኾኑን ተናግረዋል። ዘርፉ የግንባታዎችን ደኅንነት የምንከታተልበት፣ የምንቆጣጠርበት፣ ሥራዎችን በፍጥነት እና በጥራት የምናሥፈጽምበት ተግባር ነው ብለዋል።
የመሠረተ ልማት ሥራ የአንድ ዘርፍ ሥራ ብቻ አይደለም ነው ያሉት። የክልሉ የኢኮኖሚ ለውጥ፣ የሕዝብ የኑሮ መሻሻል እና የመንግሥት የልማት ቃል ኪዳን በተግባር የሚረጋገጥበት እና ኀላፊነት ሚገለጽበት መኾኑንም ተናግረዋል።
የግምገማ አፈጻጸሙ ዓላማ የክልሉን የመሠረተ ልማት አቅጣጫ ለማረጋገጥ፣ የተገኙ ውጤቶችን ለማጠናከር፣ የታዩ ድክመቶችን ለመለየት፣ የአፈጻጸም እንቅፋቶችን ለመፍታት፣ ለቀጣዩ ሩብ ዓመት ግልጽ አቅጣጫ ለማስቀመጥ እና ለመተግበር ያለመ ነው ብለዋል።
በሩብ ዓመቱ የታዩ አዎንታዊ ተግባራት:- በርካታ ዜጎች የንጹሕ መጠጥ ውኃ ተጠቃሚ መኾናቸው፣ የታዳሽ ኢነርጅ ሥርጭት ከዕቅድ በላይ መኾን፤ በኮንሥትራክሽን ዘርፍ ከ38 ሺህ በላይ ወጣቶች የሥራ ዕድል መፈጠሩ፣ በመንገድ መሠረተ ልማት የጥናት እና የዲዛይን ሥራዎችንበፍጥነት በመሻገር ወደ ግንባታ መገባቱ፤ በመስኖ የጥናት እና ዲዛይን ሥራዎች መፋጠናቸው እና እንደ መገጭ ያሉ ፕሮጄክቶች ወደ መጠናቀቅ መቃረባቸው የታዩ ውጤቶች መኾናቸውንም አንስተዋል።
“ውጤቶች የሚታዩት ሥንሠራ ብቻ ነው” ብለዋል። የመሠረተ ልማት ሥራዎች የክልሉ የኢኮኖሚ ትራንስፎርሜሽን የጀርባ አጥንት እና የልማት ሞተር መኾናቸውንም ገልጸዋል። ለመሠረተ ልማት ሥራዎች ቅድሚያ ሊሰጥ እንደሚገባም አሳስበዋል።
በሩብ ዓመቱ የታዩ ክፍተቶች፦ ብዙ ፕሮጄክቶች በጸጥታ ችግር፣ በግብዓት ዋጋ ንረት፣ በተቋራጮች የውል ጥሰት እና በአንዳንድ መሪዎች የትኩረት እጥረት ምክንያት እየዘገዩ መኾናቸውን ተናግረዋል።አንዳንድ ዞኖች እና ወረዳዎች ለመሠረተ ልማት በቂ ትኩረት አለመስጠታቸውን አንስተዋል። በቀጣይ መታረም እንዳለበትም አሳስበዋል።
በቀጣይ ምን ይጠበቃል:- ከዝናብ ጥገኝነት ለመላቀቅ፣ የምግብ ዋስትናን ለማረጋገጥ፣ የኢንዱስትሪ ግብዓትን ለማቅረብ ለወጣቶች የሥራ ዕድል ለመፍጠር የመስኖ ውኃ ልማት ወሳኝ ነው ብለዋል። ገበያ ሰውን፣ አገልግሎትን እና ልማትን ለማገናኘት ወሳኝ መንገድ መኾኑንም ተናግረዋል። የታቀዱ ቁልፍ ፕሮጄክቶችን በጊዜ እና በጥራት በማጠናቀቅ የተጠያቂነት ሥርዓትን ማረጋገጥ፣ የጸጥታ ችግር ባለባቸው አካባቢዎች ከጸጥታ ተቋማት ጋር በቅንጅት በመሥራት ፕሮጄክቶች እንዳይቆሙ እና እንዲጠናቀቁ መሥራት።የግብዓት ዋጋ ንረትን በመከታተል ተገቢውን የዋጋ ማስተካከያ በወቅቱ በማድረግ ፕሮጄክቶችን እየሠሩ ያሉ አካላት በውላቸው መሠረት እንዲያጠናቅቁ መከታተል፣ የተለያዩ ፕሮጀክቶች አፈጻጸም እና የካሳ ክፍያ በወቅቱ እንዲፈጸም ከፌዴራል መንግሥት ጋር ጠንካራ ትብብር እና ግፊት በማድረግ እየተፈጠሩ ያሉ የመልካም አሥተዳደር ችግሮችን ለመፍታት ርብርብ ማድረግ ይጠበቃል ነው ያሉት።
ዘጋቢ:- ያየህ ፈንቴየአሚኮ ዲጂታል ሚዲያ ቤተሰብ ይሁኑ!
