የኢትዮጵያ ብሔራዊ ቡድን (ዋሊያዎቹ) ከሴኔጋል ብሔራዊ ቡድን ጋር የሚያደርጉት ታላቅ ዓለም አቀፍ የእግር ኳስ ጨዋታ በመጭው ማክሰኞ በባሕር ዳር ዓለም አቀፍ ስታዲየም ይካሄዳል።
በዚሁ መሠረት የአማራ ክልል ባሕል፣ ቱሪዝም እና ስፖርት ቢሮ የስፖርት ቤተሰቡን እና ደጋፊዎችን በኢትዮጵያዊ እንግዳ ተቀባይነት ለማስተናገድ ሙሉ ዝግጅት ማድረጉን አስታውቋል።
የቢሮው ምክትል ኀላፊ አየለ አናውጤ (ዶ.ር) እንደገለጹት ይህ ጨዋታ የስፖርት ቱሪዝምን በማነቃቃት እና የኅብረተሰቡን ኢኮኖሚያዊ ተጠቃሚነት እውን በማድረግ ረገድ ከፍተኛ ድርሻ አለው።
ባለፉት አምስት ዓመታት የኢትዮጵያ ብሔራዊ ቡድን የካፍ እና የፊፋ መስፈርቶች የሚያሟላ ሜዳ ባለመኖሩ ምክንያት ጨዋታዎቻቸውን ከሀገር ውጭ ለማድረግ ተገድደው እንደነበር አውስተዋል።
ምክትል ኀላፊው ይህንን ችግር ለመቅረፍ ባለፉት ዓመታት በተከናወነው ሰፊ የግንባታ ሥራ ስታዲየሙ የካፍን ጊዜያዊ ፈቃድ በማግኘቱ አሁን ላይ ጨዋታዎች በሀገር ውስጥ መካሄድ እንደሚጀምሩ አብራርተዋል።
ቀደም ሲል በተካሄዱ ጨዋታዎች ከ100 ሺህ በላይ ታዳሚዎች መታደማቸውን በማስታወስ ዘንድሮም በርካታ እንግዶች ወደ ባሕር ዳር ከተማ እንደሚጎርፉ ይጠበቃል ነው ያሉት።
ይህም ሁነት ከትንንሽ ነጋዴዎች እስከ ትልልቅ ሆቴሎች ድረስ ሰፊ የኢኮኖሚ እንቅስቃሴ በመፍጠር ማኅበረሰቡን ተጠቃሚ ያደርጋል ተብሎ እንደሚጠበቅም አስረድተዋል።
እንግዶችን በአግባቡ ለመቀበል ከታክሲ ማኅበራት፣ ሆቴሎች እና ካፌዎች ጋር ውይይት ተደርጎ ዝግጅት መጠናቀቁ የተገለጸ ሲኾን አስተማማኝ ጸጥታን ከማረጋገጥ ባሻገር የበጎ ፈቃደኞች፣ የሕክምና እና የአምቡላንስ አገልግሎቶችም ተመቻችተዋል።
በዓለም አቀፍ ደረጃ የሚታወቁ ከዋክብት የተሠበሠቡበት የሴኔጋል ብሔራዊ ቡድን ወደ ባሕር ዳር መምጣቱ ለጨዋታው ልዩ ድምቀት የሚሰጥ እና ከተማዋን የስፖርት ቱሪዝም ማዕከል ለማድረግ ትልቅ ዕድል የሚፈጥር መኾኑም ተጠቅሷል።
በመኾኑም የከተማዋ ነዋሪ እና ደጋፊው በነቂስ ወጥቶ ስታዲየሙን በመሙላት ዋሊያዎቹን በስፖርታዊ ጨዋነት በመደገፍ ታሪካዊ ድል እንዲመዘገብ አሻራቸውን እንዲያኖሩ ጥሪ ቀርቧል።
#EthiopiaVsSenegal #BahirDar #SportsTourism #አሚኮ #ኢትዮጵያ🇪🇹
#ባሕር_ዳር #መስከረም_17_2019_ዓ_ም
ዘጋቢ፦ሥራውድንቅ ደሳለው
የአሚኮ ዲጂታል ሚዲያ ቤተሰብ ይሁኑ!
