ትምህርትን መደገፍ ሀገር አሻጋሪ ትውልድን መፍጠር ነው።

የአማራ ክልል ገቢዎች ቢሮ አዲስ ዓመትን አስመልክቶ ቤተሰቦቻቸው በገቢ ዝቅተኛ ለኾኑ ተማሪዎች የትምህርት ቁሳቁስ እና ዝቅተኛ ደመወዝ ተከፋይ ለኾኑ የተቋሙ ሠራተኞች የበዓል መዋያ ድጋፍ አድርጓል።

የአማራ ክልል ገቢዎች ቢሮ ኀላፊ መንገሻ ፈንታው (ዶ.ር) መንግሥት ሰው ተኮር ተግባርን የሚያከናውን በመኾኑ አዲሱ ትውልድ የሀገር ፍቅር እንዲኖረው ለተማሪዎች የመማሪያ ቁሳቁስ ድጋፍ መደረጉን ተናግረዋል።

ተቋሙ በተለያየ ጊዜ በገቢ ዝቅተኛ ለኾኑ የኅብረተሰብ ክፍሎች ድጋፍ ሲያደርግ እና የመኖሪያ ቤት ሲያድስ መቆየቱን አንሠተው በቀጣይም ይህ ተግባር ተጠናክሮ እንደሚቀጥል ገልጸዋል።

ድጋፉ ተማሪዎች እና ሠራተኞች በአዲሱ ዓመት አዲስ ተስፋ ይዘው በትምህርታቸው፣ በሥራቸው ውጤታማ እና ስኬታማ እንዲኾኑ ለማስቻል ያለመ መኾኑን ተናግረዋል።

ተማሪዎችን ማገዝ ትውልድን ማነጽ መኾኑንም አንስተዋል። የትምህርት ቤቶች ደረጃ እንዲሻሻል፤ ግብዓት እንዲሟላ፤ ውጤታማ የትምህርት ሥርዓት እንዲኖር እና የትምህርት ጥራት እንዲረጋገጥ ግብር ወሳኝ በመኾኑ ማኅበረሰቡ በአዲሱ ዓመት በታማኝነት ግብር እንዲከፍልም አሳስበዋል።

ታማኝ ግብር ከፋይ ሲኖር የትምህርት ጥራት ይረጋገጣል፤ መሠረተ ልማቶች ይገነባሉ፤ ለቀጣዩ ትውልድ የበለጸገች ሀገርን ማስረከብ ይቻላል ነው ያሉት። ትምህርትን መደገፍ ሀገር አሻጋሪ ትውልድን መፍጠር ነውም ብለዋል።

#አሚኮ #የገቢዎችቢሮ_ድጋፍ #ኢትዮጵያ

#ባሕር_ዳር #ጳጉሜን_05_2018_ዓ_ም

ዘጋቢ:- ያየህ ፈንቴ

የአሚኮ ዲጂታል ሚዲያ ቤተሰብ ይሁኑ!