ሀገርን ከውድቀት መታደጊያ የጥበብ መንገድ

🇪🇹 ሀገርን ከውድቀት መታደጊያ የጥበብ መንገድ

ሀገርን በጽኑ መሠረት ላይ ለማቆም፣ የተበጣጠሱ የኅብረተሰብ ትስስሮችን ለመጠገን እና ዘላቂ ሰላምን ለማስፈን ብሔራዊ ምክክር ወደር የማይገኝለት የመፍትሄ ቁልፍ ነው። ልዩነቶች ሲሰፉ፣ አለመግባባቶች ወደ ግጭት ሲያመሩ እና የሀገር ህልውና አደጋ ላይ ሲወድቅ ዜጎች በጠረጴዛ ዙሪያ ተቀምጠው የልባቸውን የሚነጋገሩበት፣ ያለፈውን ቁስል የሚያክሙበት እና የወደፊቱን የጋራ ራዕይ የሚስሉበት ብቸኛው መንገድ ዕውነተኛ ውይይት ነው።

ታላቁ የሰላም ታጋይ ኔልሰን ማንዴላ “ከጠላትህ ጋር ሰላም መፍጠር ከፈለክ፣ ከጠላትህ ጋር አብረህ መሥራት እና መወያየት አለብህ” እንዳሉት ዕውነተኛ ምክክር የሚጠይቀው ከወዳጅ ጋር ብቻ ሳይኾን ሀሳብን በጽኑ ከሚቃወም ወገንም ጋር በድፍረት መነጋገርን ነው። ይህ የድፍረት እርምጃ ፍርሃትን አሸንፎ መጓዝን ይጠይቃል።

ጆን ኤፍ ኬኔዲ “ከፍርሃት ተነስተን በጭራሽ አንደራደር፤ ነገር ግን ለመደራደር ከቶ እንዳንፈራ” በማለት የገለጹትም ይህንኑ የሞራል ልዕልና ነው። ኢትዮጵያውያን አባቶቻችንም ቢኾኑ የውይይትን እና የእርቅን ጥልቅ ትርጉም በሚገባ ተረድተውት ኖረዋል፤ “ከመመካከር ይገኛል መከበር” እንደሚባለው የሰዎችን ክብር እና የሀገርን ሉዓላዊነት ጠብቆ ለማቆየት ምክክር የጀርባ አጥንት ነው።

አብሮነትን እና መቻቻልን ለማጎልበት ማርቲን ሉተር ኪንግ “እንደ ወንድማማች አብረን መኖርን መማር አለብን፤ አለበለዚያ ግን እንደ ሞኞች አብረን እንጠፋለን” በማለት ያስጠነቀቁት ቃል ዛሬም ለእኛ ታላቅ የሕይወት ትምህርት ነው ። ልዩነቶቻችንን በመነጋገር ካልፈታናቸው ራሳቸው ልዩነቶቻችን ሀገርን ወደ ከፋ አዘቅት ሊከቱት ይችላሉ። “ድር ቢያብር አንበሳ ያስር” የሚለው ጥልቅ ኢትዮጵያዊ ብሂል እንደሚያስተምረን በምክክር እና በመግባባት አንድ የኾነ ሕዝብ ከፊቱ የተጋረጠበትን ማንኛውንም አይነት ሀገራዊ ፈተና ማለፍ ይችላል።

ብሔራዊ ምክክር ስኬታማ እንዲኾን ግልጽነት፣ ታጋሽነት እና የሌላውን ሀሳብ ለማዳመጥ ዝግጁ መኾንን ይጠይቃል። “በመመካከር የተቆረጠ ዛፍ አያብብም” እንደሚባለው ከስሩ በውይይት የተፈታ እና መግባባት ላይ የተደረሰበት ሀገራዊ ችግር ዳግም ሀገርን ወደ ማመስ አይመለስም።

ምክክር የራስን ሀሳብ በሌላው ላይ መጫን ሳይኾን በመቻቻል እና በይቅርታ ላይ የተመሠረተ አዲስ የጋራ ታሪክን መጻፍ ነው። አሁን ባለንበት ጊዜ ሀገርን ለማዳን፣ ታሪክን ለማረም እና ለቀጣዩ ትውልድ የተሻለች ሀገርን ለማስረከብ ከልብ የኾነ ሁሉንም ያሳተፈ እና ዕውነተኛ ብሔራዊ ምክክር ማካሄድ የውዴታ ግዴታ በመኾኑ መላው ሕዝብ ሂደቱን በአወንታ በመመልከት መደገፍ ይኖርበታል።

#አሚኮ #ብሔራዊ_ምክክር #ኢትዮጵያ #ሰላም #አንድነት 🇪🇹

#ባሕር_ዳር #ነሐሴ_04_2018_ዓ_ም

ዘጋቢ፦ስማቸው አጥናፍ

የአሚኮ ዲጂታል ሚዲያ ቤተሰብ ይሁኑ!