ወጣቱ የአባቶቹን የጀግንነት ሥነ-ልቦና ተላብሶ ለሰላም ዘብ ሊቆም ይገባል።

በበዓሉ ላይ ጥንታዊ ጀግኖች አርበኞች፣ የዞን እና የከተማ አሥተዳደሩ ከፍተኛ የሥራ ኀላፊዎች ተገኝተዋል።

የደቡብ ጎንደር ዞን ጥንታዊ ጀግኖች አርበኞች ማኅበር ዋና ጸሐፊ አንባቸው ሞላ ባስተላለፉት መልዕክት ፋሽስት ጣሊያን በዓድዋ ሽንፈት ከተከናነበ በኋላ ለ40 ዓመታት ተዘጋጅቶ በዘመናዊ ጦር ዳግም ወረራ ቢፈጽምም አባት አርበኞች በደም እና በአጥንታቸው ተዋድቀው የሰንደቅ ዓላማቸውን ክብር ከፍ አድርገው ነፃነታቸውን አስከብረዋል ብለዋል።

የዛሬዋ ኢትዮጵያ የቆመችው እነዚህ አርበኞች “ለባዕድ አንገዛም” በሚል ወኔ በከፈሉት መሥዋዕትነት መኾኑንም አብራርተዋል።

አቶ አንባቸው አክለውም የአሁኑ ትውልድ አርበኝነትን በልማት፣ በሰላም እና በዕውቀት ሊገልጽ እንደሚገባም ገልጸዋል።

ሀገርን በቅንነት ማገልገል፣ ሌብነት እና ሙስናን ማውገዝ እንዲሁም ዘረኝነትን እና ጦርነትን መጥላት የዘመኑ አርበኝነት መገለጫዎች መኾናቸውን አሳስበዋል።

የደብረ ታቦር ከተማ አሥተዳደር ባሕል፣ ቱሪዝም እና ስፖርት መምሪያ ኀላፊ አለበል ደመላሽ በበኩላቸው የኢትዮጵያ አርበኞች የከፈሉት መሥዋዕትነት ለኢትዮጵያ ብቻ ሳይኾን ለመላው አፍሪካውያን የነፃነት ፋና ወጊ መኾኑን ገልጸዋል።

ወጣቱ የአባቶቹን የጀግንነት ሥነ-ልቦና ተላብሶ ራሱን በልማት ላይ ማዋል እና ለሰላም ዘብ እንዲቆምም ኀላፊው ጥሪ አቅርበዋል።

#Ethiopia

የአሚኮ ዲጅታል ቤተሰብ ይሁኑ

ለኅብረተሰብ ለውጥ እንተጋለን !