
የኢትዮጵያ ኤሌክትሪክ አገልግሎት በ2019 በጀት ዓመት ባለፉት አራት ወራት ብቻ 2 ሺህ 472 ኪ.ሜ የኤሌክትሪክ መስመሮችን የመልሶ ግንባታ፣ የማሻሻያ እና የማስፋፊያ ሥራ ማከናወኑን አስታወቀ።
ሥራዎቹ በተቋሙ የውስጥ ፋይናንስ ብቻ የተከናወኑ መሆናቸውን የአገልግሎቱ ኮሙኒኬሽን ሥራ አስፈጻሚ አንዋር አብራር ገልጸዋል።
በዚህም በነባር መስመሮች ላይ በተከናወነው የመልሶ ግንባታና የማሻሻያ ሥራ 831 ኪሎ ሜትር ሥራ ተከናውኗል ብለዋል።
481 ትራንስፎርመሮች በከፍተኛ አቅም ባላቸው ትራንስፎርመሮች የመተካትና 411 ተጨማሪ ትራንስፎርመሮች በተለያዩ አካባቢዎች ተከላ ተደርጎላቸዋልም ብለዋል።
የኤሌክትሪክ አገልግሎት ሽፋንን ለማስፋፋት በተከናወነው ሥራ ደግሞ 978 ኪሎ ሜትር መካከለኛ መስመር እና 662 ኪሎ ሜትር ዝቅተኛ መስመር በድምሩ 1 ሺህ 641 ኪሎ ሜትር አዲስ መስመር መዘርጋቱንና በእነዚህ የማስፋፊያ ሥራዎች 1 ሺህ 744 ትራንስፎርመሮች ተከላ እንደተደረገላቸው አመልክተዋል።
እነዚህ ሥራዎች በተቋሙ የውስጥ ፋይናንስ ብቻ መከናወናቸው የኢትዮጵያ ኤሌክትሪክ አገልግሎት የነባር መስመሮችን ጥራትና አቅም ለማሻሻል፣ የኤሌክትሪክ ሽፋንን ለማስፋፋት እና የአገልግሎት ተደራሽነትንና ቀጣይነትን ለማጠናከር ያለውን ቁርጠኝነት ያሳያል ብለዋል።
የመስመሮች መልሶ ግንባታና ማሻሻያ፣ የትራንስፎርመሮች አቅም ማሳደግ እና አዳዲስ መስመሮችን መዘርጋት የኤሌክትሪክ አቅርቦትን ለማጠናከር፣ የአገልግሎት ጥራትን ለማሻሻልና የኢንዱስትሪ፣ የንግድ፣ የግብርና እና የማኅበራዊ አገልግሎቶች ዕድገትን ለመደገፍ ጉልህ አስተዋጽኦ እንዳላቸውም ጠቁመዋል።
#የመደመር_መንግሥት!
#AMECO #Red_Sea_Access #Abbay_River #Ethiopia_Sovereignty
#ባሕር _ዳር #ኅዳር_10_2019_ዓ_ም
የአሚኮ ዲጂታል ሚዲያ ቤተሰብ ይሁኑ!
