ብልጽግና ፓርቲ የአፍሪካ ፖለቲካ ፓርቲዎች ኢኒሼቲቭን በበላይነት እንዲመራ በሙሉ ድምፅ ተመረጠ።

በአዲስ አበባ በተካሄደው 2ኛው የአፍሪካ ፖለቲካ ፓርቲዎች ጉባኤ (APPS) ዓበይት ውሳኔ፣ የብልጽግና

ፓርቲ የአፍሪካ ፖለቲካ ፓርቲዎች ኢኒሼቲቭን (APPI) በበላይነት እንዲመራ በሙሉ ድምፅ የተመረጠ ሲሆን፣ ይህም የፓርቲውን አህጉራዊ ተሳትፎና እውቅና የሚያጎላ ከፍተኛ ምዕራፍ ነው።

ይህ ውሳኔ የተሰጠው ከአፍሪካ መሪ ፖለቲካ ፓርቲዎች በተወከሉ ተሳታፊዎችና የፓርቲ መሪዎች ምክክር ከተደረገ በኋላ ነው።

ብልጽግና ፓርቲ በሀገር ግንባታ፣ በኢኮኖሚ ትራንስፎርሜሽን እና በ”መደመር” ፍልስፍና ያለው ልምድ በውይይቶች ወቅት ጎልቶ የወጣ ሲሆን፣

ተሳታፊዎች ይህ ተሞክሮ ለመላው አፍሪካ ፖለቲካ ፓርቲዎችና ሀገራት ጠቃሚና ሊቀረጽ የሚችል ተሞክሮ መሆኑን ጠቁመዋል።

የአፍሪካ ፖለቲካ ፓርቲዎች ኢኒሼቲቭ የአፍሪካ ፖለቲካ ፓርቲዎች ጉባኤን ውሳኔዎችና የአቋም መግለጫዎች ተግባራዊ ለማድረግ ሥልጣን የተሰጠው አስፈጻሚ አካል ነው።

የላቀ ተልዕኮውም የአፍሪካ ፖለቲካ ፓርቲዎችን ከምርጫ ቅስቀሳ ማሽነሪነት አውጥቶ ለፖሊሲ ፈጠራ፣ ለበጎ አስተዳደር፣ ለላቀ አመራር ልማትና ለኢኮኖሚ ሽግግር አስተዋጽኦ ወደሚያበረክቱ ቋሚና ጠንካራ ተቋማት ማሸጋገር ነው።

ይህ ውጤት ለብልጽግና ፓርቲም ሆነ ለኢትዮጵያ ትልቅ አህጉራዊ እውቅናን የሚያሳይ ሲሆን፣ የሀገሪቱን የልማት ተሞክሮና በመደመር ዕይታ የተገነባውን የሀገር ግንባታ ራዕይ ሰፋ ወዳለው የአፍሪካ ተቋማዊና ፖለቲካዊ ውይይት የሚያመጣ ነው።

የብልጽግና ፓርቲ የፖለቲካ ዘርፍ እና ሕዝብ ግንኙነት ኀላፊ ሚኒስትርና የብልጽግና ምክር ቤት አባል ቢቂላ ሁሪሳ (ዶ.ር) የAPPI ዋና ጸሐፊ ሆነው የተሾሙ ሲሆን፣ የንቅናቄውን ዋና ጽሕፈት ቤትና አህጉራዊ የማስፈጸም አጀንዳ በበላይነት ይመራሉ።

በሌላ በኩል 2ኛው የአፍሪካ ፖለቲካ ፓርቲዎች ጉባኤ በስኬት እየተካሄደ ይገኛል፤ ዛሬም ሦስተኛና የመጨረሻ ቀኑ ላይ ደርሷል።

ከተለያዩ የአፍሪካ ሀገራት የመጡ ተወካዮች በኢትዮጵያ የልማት ተሞክሮና በብልጽግና ፓርቲ የሀገር ትራንስፎርሜሽን አስተዋጽኦ ላይ ከፍተኛ ፍላጎት አሳይተዋል። ከፍተኛ ጉጉት የተጣለበት የ”አዲስ አበባ መግለጫ” ዛሬ እንደሚወጣ የሚጠበቅ ሲሆን፣ ይህም የዚህ አህጉራዊ ስብሰባ ዋና ውጤት ይሆናል።

ይህ ጉባኤ በብልጽግና ፓርቲ አህጉራዊ ተሳትፎ ላይ አዲስ ምዕራፍ የሚያበስር፣ የኢትዮጵያን የልማት ተሞክሮ እውቅና የሚያንጸባርቅ እንዲሁም ጠንካራ ፖለቲካዊ ተቋማትን ለመገንባት፣ አብሮ ለመማርና ለጋራ የአፍሪካ ብልጽግና ያለውን ቁርጠኝነት የሚያረጋግጥ ነው።

#የመደመር_መንግሥት!
#ትልቅ_ሀገር_ትልቅ_ሕዝብ_ታላቅ_ርዕይ! 🇪🇹
#ባሕር_ዳር #ጥቅምት_28_2019_ዓ_ም

የአሚኮ ዲጂታል ሚዲያ ቤተሰብ ይሁኑ!