🔥ባለምጡቅ አዕምሮዎቹ ሕዳሴ ዘመኑ እና ሙባረክ ሙሐመድ በክልሉ መንግሥት እና ሕዝብ ተሸልመዋል!

ዕውቀት የማይነጥፍበት አማራ ክልል አስቸጋሪ እና ፈታኝ ወቅቶችን ቢያሳልፍም ፈተናን ተቋቁመው ለውጤት የሚበቁ ባለ ምጡቅ አዕምሮ ተማሪዎች አይታጡበትም።

ባለፉት ዓመታትም በአስቸጋሪ ሁኔታዎች ውስጥ አልፈው እንደ ወርቅ ተፈትነው ለከፍተኛ ትምህርት የበቁ በርካታ ተማሪዎችን አፍርቷል።

በ2018 የትምህርት ዘመንም ችግሮችን ተቋቁመው በርካታ የክልሉ ተማሪዎች ለዩኒቨርሲቲ መግቢያ የሚያበቃቸውን ውጤት አምጥተዋል። እነዚህ ተማሪዎች ፈተናን በውጤት ቀይረዋል፤ መሠናክልን በጥበብ አልፈዋል፤ ችግርን በድል አሸንፈዋል። ትናንትን ተሻግረው ለነገ ሕይታቸው መሠረት ጥለዋል።

ከእነዚህ ተማሪዎች መካከል ተማሪ ሙባረክ ሙሐመድ በ12ኛ ክፍል ሀገር ዓቀፍ ፈተና 587 በማምጣት ከአማራ ክልል ተፈታኝ ተማሪዎች መካከል ከፍተኛውን ውጤት ያስመዘገበ ባለ ምጡቅ አዕምሮ ተማሪ ነው። በተመሳሳይ ተማሪ ሕዳሴ ዘመኑ ደግሞ 583 በማምጣት በሀገር ዓቀፍ ደረጃ ከሴቶች ከፍተኛውን ውጤት ማስመዝገቧ የሚታወስ ነው።👏👏👏

እነዚህ የነገ ተስፋ የኾኑት እንደወርቅ ተፈትነው ያለፉት ዕንቁዎች ችግር ሳይበግራቸው፣ ፈተናቸውን በድል ተወጥተው፣ ቤተሰቦቻቸውን እና የክልሉን ስም ከፍ አድርገው አስጠርተዋል። ባስመዘገቡት ውጤትም ከሰሞኑ በክልል ደረጃ በተካሄደው የእውቅና መርሐ ግብር የክልሉ መንግሥት ሽልማት አበርክቶላቸዋል።

ተማሪ ሙባረክ ሙሐመድ እንደተናገረው የተበረከተላቸው ሽልማት ለወደፊቱም ትልቅ ኀላፊነት ጥሎብናል ነው ያለው። በቀጣይ በሚኖረው የትምህርት ቆይታ በሜካኒካል ኢንጂነሪንግ በማጥናት በኢትዮጵያ ውስጥ በቴክኖሎጂ መፍትሔዎች ላይ ትኩረት በማድረግ ሀገሩን ማገልገል እንደሚፈልግ ሀሳቡን አጋርቶናል።

ተማሪ ሕዳሴ ዘመኑ እንደተናገረችው የተደረገው ሽልማት እና እውቅና የሚያስደስት ነበር ብላለች። ለወደፊቱም ሌሎች ተማሪዎች እንዲበረታቱ የሚያደርግ ስለመኾኑም አስተያየቷን ተናግራለች። “ለእኛም በቀጣይ ጠንክረን በመማር የበለጠ ውጤት እንድናመጣ የሚያበረታታ ነው” ብላለች።

በዩኒቨርሲቲ በሚኖራት የትምህርት ቆይታዋ በሶፍት ዌር ኢንጂነሪንግ በመማር ለማኅበረሰብ ችግር ፈች በኾኑ በቴክኖሎጂ ዘርፍ ሥራዎች ላይ የራሷን አስተዋጽኦ ማበርከት እንደምትፈልግ ሀሳቧን አጋርታናለች።

ከአማራ ክልል ትምህርት ቢሮ የተገኘው መረጃ እንደሚያመለክተው በ2018 የትምህርት ዘመን ሀገር ዓቀፍ የ12ኛ ክፍል ፈተና ከተፈተኑት ተማሪዎች መካከል 500 እና ከዚያ በላይ ያስመዘገቡት 659 ተማሪዎች ናቸው።

ከእነዚህ ውስጥ 540 እና ከዚያ በላይ ውጤት ላስመዘገቡት 193 ተማሪዎች የምስክር ወረቀት፣ የገንዘብ፣ የዋንጫ እና ላፕ ቶፕ ኮምፒዩተሮች ሽልማት ተበርክቶላቸዋል።

#የመደመር_መንግሥት!
#ትልቅ_ሀገር_ትልቅ_ሕዝብ_ታላቅ_ርዕይ!🇪🇹
#ባሕር_ዳር #ጥቅምት_15_2019_ዓ_ም

✍️ዘጋቢ:- አሰፋ ልጥገበው

የአሚኮ ዲጂታል ሚዲያ ቤተሰብ ይሁኑ !