በዓለ ስቅለት እና ሥርዓቱ

ኢየሱስ ክርስቶስ የሰውን ልጅ ከኃጥያት ለማዳን ሲል መከራ የተቀበለበት፤ ራሱን አሳልፎ የሰጠበት፤ ለሰው ልጅ ያለውን ፍቅር በመስዋዕትነት የገለጠበት በዓል ነው።

ምዕመናን ዕለቱን በጾም፣ በጸሎት እና በስግደት የክርስቶስን መከራ እና ሞት እያስታወሱ በታላቅ በተማጽኖ እና በሃዘን ያሳልፉታል።

በኢትዮጵያ ኦርቶዶክስ ተዋሕዶ ቤተክርስቲያን ሥርዓት መሠረት ዕለቱ ከጠዋት እስከ ምሽት በሰዓታት በተከፋፈለ ልዩ ልዩ መንፈሳዊ ክዋኔዎችም ይከበራል።

በኢትዮጵያ ኦርቶዶክስ ተዋህዶ ቤተክርስቲያን በባሕር ዳር ሀገረ ስብከት የመንበረ ስብሐት ቅድስት ሥላሴ ካቴድራል ስብከተ ወንጌል ኀላፊ መጋቢ ሐዲስ ስማ ኮነ ያየህራድ በዕለቱ ስለሚከናወኑት ሃይማኖታዊ ክዋኔዎች ለአሚኮ ማብራሪያ ሰጥተዋል።

ከጠዋቱ አንድ ሰዓት:- ኢየሱስ ክርስቶስ በጲላጦስ የተከሰሰበት ሰዓት ነው። በዚህ ሰዓት ሦስት ዲያቆናት ቤተክርስትያኑን ሦስት ጊዜ እየዞሩ ቃጭል እየደወሉ በማወጅ ሥርዓቱ ይጀመራል። የዳዊት መዝሙር፣ የነበያት፣ የመሐልዬ እና ሌሎችም ለሰዓቱ የሚኾኑት የጸሎት ሥነ ሥርዓቶ ይፈጸማሉ፤ ስግደት ይከናወናል ብለዋል።

ተዓምረ ማርያም፣ ተዓምረ ኢየሱስ፣ የዕለቱ ስንክሳርም ይነበባሉ። የዕለቱ ወንጌልም ከወትሮው በተለየ መልኩ በዜማ ይነበባል። በኋላም ኪራያላይሶን እየተባለ ይጸለያል ነው ያሉት።

ከረፋዱ ሦስት ሰዓት ላይ:- ኢየሱስ ክርስቶስ በጲላጦስ ፊት የቆመበት እና የሞት ፍርድ የተፈረደበት ሰዓት ነው።

በዚህ ሰዓት ለሰዓቱ የተያዙት የዳዊት መዝሙራት፣ የውዳሴ ማርያም፣ የነበያት፣ የመሐለዬ ጸሎት እና የወንጌል ምንባባት ይነበባሉ።

ምሥለ መሥቀሉ ከመቅደሱ ፊት ለፊት ይወጣል። ሁለት ከበሮዎች ጥቁር መጎናጸፊያ ለብሰው በግራ እና በቀኝ በማስቀመጥ ክዋኔው ይከወናል ብለዋል። ጌታን ያንገላቱበትን ድርጊት በሚያስታውስ መንገድ ሥርዓቱ ይከወናል፤ ስግደት ይሰገዳል ነው ያሉት።

ከቀኑ ስድስት ሰዓት ኢየሱስ ክርስቶስ በቀራንዮ ዓደባባይ በመስቀል ላይ የተሰቀለበት ሰዓት ነው።

ይህንን በማስታወስም በዕለተ ሰዓቱ የተመደቡት የጸሎት ምንባባት ይነበባሉ። ክርስቶስን መራራ ሀሞት እንዳጠጡት ለማጠየቅ ከጽናው ላይ

ከርቤ ይደረጋል። “ለመስቀልከ እንስገድ” እየተባለ ስግደት ይከናወናል ብለዋል።

ከቀኑ ዘጠኝ ሰዓት ላይ:- ኢየሱስ ክርስቶስ በገዛ ፈቃዱ ነፍሱን ከስጋው የለየበት ሰዓት ነው።

የስግደት ሥነ ሥርዓቱ በዕዝል የዜማ ስልት እየተመራ”ኪሪያላይሶን” እየተባለ ይሰገዳል። “አቤቱ ጌታ ኾይ በመንግሥትህ አስበን” እየተባለ 36 ጌዜ እንደሚጸለይ ገልጸውልናል።

ከቀኑ 11 ሰዓት ላይ:- የክርስቶስ ቅዱስ ሥጋ ከመስቀል ወርዶ በዮሴፍ እና በኒቆዲሞስ አማካኝነት ወደ መቃብር የወረደበት ነው ብለዋል።

ሙሉው መዝሙረ ዳዊት፣ አንቀጸ ብርሃን፣ የነቢያት እና የውዳሴ ማርያም እና ሌሎችም ምንባባት ይጸለያሉ፤ 400 እግዚኦታ ይደረሳል ነው ያሉት።

በዚህ ሰዓት ስግደት አይሰገድም። ንሴብሖ የሚለው መዝሙር ይዘመራል ብለዋል።

ምእመናን በጾም እና በጸሎት በቆዩበት በሕማማት ሳምንት የሠሩትን ኃጥያት በመናዘዝ የሚሰጣቸውን ንስሐ የሚቀበሉበት ሥርዓት እንደኾነ ነው የነገሩን።

በመጨረሻም “በሰላም ግቡ” ተብሎ ምዕመናን ወደ ቤታቸው ይሰናበታሉ።

እንኳን ለኢየሱስ ክርስቶስ የስቅለት በዓል አደረሳችሁ።

በአሰፋ ልጥገበው

የአሚኮ ዲጂታል ሚዲያ ቤተሰብ ይሁኑ!

ለኅብረተሰብ ለውጥ እንተጋለን!