ባሕር ዳር ከተማ ለጽዳቷ የማይመጥኑ የፕላስቲክ ከረጢቶችን መጠቀም ከለከለች።

አዋጁን መሠረት በማድረግ የባሕር ዳር ከተማ አሥተዳደርም ለአንድ ጊዜ ብቻ የሚያገለግሉ የፕላስቲክ ከረጢቶችን መጠቀም ከዛሬ ጀምሮ የተከለከለ መኾኑን አስታውቋል።

በከተማ አሥተዳደሩ አካባቢ ጥበቃ፣ ጽዳት እና ውበት ተጠሪ ጽሕፈት ቤት የአካባቢ ጥበቃ ቡድን መሪ አበቡ ወልደሚካኤል እንደገለጹት ቀደም ብሎ ክልከላው ተግባራዊ ከመደረጉ በፊት የተለያዩ የግንዛቤ ማስጨበጫ ሥራዎች ሢሠሩ መቆየቱን አንስተዋል።

ከዛሬ ጀምሮ ደግሞ በከተማዋ ለአንድ ጊዜ ብቻ የሚያገለግሉ የፕላስቲክ ከረጢቶችን ሲጠቀም ወይም ሲያቀርብ የተገኘን አካል በአዋጁ በተደነገገው መሠረት ተጠያቂ ለማድረግ መወሰኑን ለአሚኮ ተናግረዋል።

የፕላስቲክ ምርት ለረጅም ጊዜ የማይበሰብስ በመኾኑ በብዝኀ ሕይወት፣ በሰው እና በእንስሳት ጤና ላይ ከፍተኛ ተጽዕኖ እንደሚያመጣ ተናግረዋል። በተለይም በከተማ ካሉት የደረቅ ቆሻሻ ምጣኔ የፕላስቲክ ውጤቶች ከፍተኛውን መጠን እንደሚይዙ ጠቁመዋል።

ተግባራዊ መደረግ የጀመረው ውሳኔም ከተማዋን ጽዱ እና ውብ ለማድረግ ከፍተኛ አስተዋጽኦ እንደሚያበረክት አመላክተዋል። ማኅበረሰቡ ጉዳቱን ተገንዝቦ ከፕላስቲክ ከረጢት ይልቅ በቀላሉ የሚበሰብሱ ምርቶችን እንዲጠቀም ባለሙያዋ መክረዋል።

በአዋጁ አንቀጽ 25 ስር እንደተደነገገው አንድ ጊዜ ብቻ ጥቅም ላይ የሚውል የፕላስቲክ ከረጢት ይዞ የተገኘ ማንኛውም ሰው ከ2 ሺህ እስከ 5 ሺህ ብር ይቀጣል፡፡

የፕላስቲክ ከረጢት ያመረተ፣ ወደ ሀገር ውስጥ ያስገባ፣ ለገበያ ያቀረበ ወይም ሲሸጥ የተገኘ ከ50 ሺህ ብር እስከ 200 ሺህ ብር የገንዘብ መቀጮ እንዲኹም ከአምስት ዓመት በማይበልጥ ጽኑ እስራት ያስቀጣል፡፡

ዘጋቢ፦ አሰፋ ልጥገበው

የአሚኮ ዲጂታል ሚዲያ ቤተሰብ ይሁኑ!

ለኅብረተሰብ ለውጥ እንተጋለን!