የወረርሽኙን አሳሳቢነት በመገንዘብ ምዕመኑ በየቤቱ ሆኖ ሥርዓተ ጸሎት አንዲፈጽም ጥሪ ቀረበ፡፡

ይሁን እንጅ መመሪያው ተግባራዊ የተደረገበት ጊዜ አጭር በመሆኑና በሁኔታዎች አለመመቻቸት ምክንያት ወደ ቤተሰቦቻቸው ያልሄዱ 1 ሺህ 459 የአብነት ተማሪዎች በሀገረ ስብከቱ መኖራውንም ጠቁመዋል፡፡ የአብነት ተማሪዎቹ ምቹ ሁኔታ እንዲፈጠርላቸው ቤተ ክርስቲያኒቱ እየሠራች ትገኛለችም ተብሏል፡፡

በቅዱስ ሲኖዶስ ደረጃም ይሁን በሊቃውንት ጉባኤ ተወስኖ በሀገረ ስብከት ደረጃ በተነገረው መመሪያ መሠረት በርካታ ምዕመናን ቤታቸው ውስጥ ሆነው እየጸለዩ እንደሚገኑም የባሕር ዳር ሀገረ ስብከት የሊቃውንት ጉባኤ ሰብሳቢ ሊቀ ሊቃውንት ስምዐኮነ መልአክ ተናግረዋል፡፡ ከዚህ በተቃራኒው ደግሞ መመሪያውን ተግባራዊ ያላደረጉ የሃይማኖቱ ተከታዮች እስከ ትናንት መጋቢት 27/2012 ዓ.ም ድረስ በጋራ ሆነውና ርቀታቸውን ሳይጠብቁ ቤተ ክርስቲያን እየሄዱ እንደነበር አንስተዋል፡፡ የሃይማኖቱ ተከታዮች የበሽታውን አሳሳቢነት አስመልክቶ ቅዱስ ሲኖዶሱ ያስተላለፈውን መመሪያ ማክበር እንደሚጠበቅባቸውም መክረዋል፡፡ ቤተ ክርስቲያን እንደተዘጋችና አገልግሎቱም እንደተቋረጠ ተደርጎ የሚሠራጨው ወሬም መታረም እንደሚገባው አስገንዝበዋል፡፡

የሲኖዶሱም ይሁን የመንግሥት መመሪያ ቤተ ክርስቲያኒቱ እንድተዘጋና አገልግሎቱ እንዲቋረጥ አለመሆኑን ነው የባሕር ዳር ሀገረ ስብከት የሊቃውን ጉባኤ ሰብሳቢ ሊቀ ሊቃውንት ስምዐኮነ መልአክ ያስረዱት፡፡ የተላለፈው መመሪያ ቅዱስ ሲኖዶሱም፣ በየአብያተ ክርስቲያናት የሚመደቡ አገልጋይ ካህናትም በቤተ ክርስቲያን ዙሪያ አስፈላጊው ነገር ተዘጋጅቶላቸው ሱባኤ ይዘው፣ ጸሎት እያደረጉ አገልግሎቱን እንዲሰጡ መደረጉን ነው ያስገነዘቡት፡፡

ነገር ግን ቤተ ክርስቲያኒቱ እንደተዘጋች አድርገው የተሳሳቱ መረጃዎችን በማሠራጨት ሕዝቡን የሚያደናግሩ ሰዎች እንዳሉ መታዘባቸውንም አንስተዋል፤ የሃይማኖቱ ተከታች የሚናፈሱ ወሬዎች ውሸት መሆናቸውን በመረዳት የተላለፈውን የቅዱስ ሲኖዶስ መመሪያ ማክበር እንዳለባቸው ነው ሊቀ ሊቃውንት ስምዐኮነ መልአክ ያሳሰቡት፡፡ ‘‘ሰዎች በቤት ውስጥ ጸሎት እንዲያደርሱ የተደረገበት ዓላማ የወረርሽኙን ስርጭት ለመቀነስ ነው’’ ያሉት የባሕር ዳር ሀገረ ስብከት የሊቃውን ጉባኤ ሰብሳቢ በጋራ የሚደረጉ እንደ ድግስ፣ ሐዘንና መሠል ማኅበራዊ ክዋኔዎች የቫይረሱን መስፋፋት ሊያሰፉ ስለሚችሉ ጥንቃቄ መደረግ እንዳለበትም መክረዋል፡፡ አንድ ሰው ዝክር እንዲዘክር ሃይማኖታዊ ሥርዓቱ የሚያዝዘው ድሆችና ጦም አዳሪዎችን ለማስታወስ እንጅ ከጎረቤቱ ጋር ብድር ሊመላለስበት እንዳልሆነም አስረድተዋል፡፡ በመሆኑም የሃይማኖቱ ተከታዮች አጋጣሚውን ተጠቅመው ምፅዋቱን ማድረስ እንዳለባቸው መልእክት አስተላልፈዋል፡፡

ዘጋቢ፡- ኃይሉ ማሞ