ጁንታውን ለመደምሰስ በሚደረገው የህልውና ዘመቻ የእነቴጌ ጣይቱን ታሪክ ለመድገም ቆርጠን ተነስተናል” በምዕራብ ጎጃም ዞን ለህልውና ዘመቻ ስንቅ የሚያዘጋጁ ሴት አርበኞች

በስንቅ ዝግጅቱ ላይ ያነጋገርናቸው ወይዘሮ ፋሲካ እንዳለው እና ወርቅነሽ ጉዳይ ከስንቅ ዝግጅቱ ባሻገር እስከ ህይዎት መስዋእትነት ለመክፈል መዘጋጀታቸውን ገልጸዋል፡፡ በህልውና ዘመቻው የሴቶች ተሳትፎ በጦርነቱ ግንባር ከመሰለፍ ባሻገር ስንቅ በማዘጋጀት ከፍተኛ አስተዋጽኦ እያደረጉ እንደኾነ የገለጹት የደቡብ አቸፈር ወረዳ ሴቶች ህጻናትና ወጣቶች ጉዳይ ጽሕፈት ቤት ኀላፊ ወይዘሮ ጎጃም ዓለም ናቸው::

ትህነግ ለሴቶችና ህጻናት የማይራራ አረመኔና አሸባሪ ቡድን ነው ያሉት ወይዘሮ ጎጃም ”ለህልውናችን ስንል ጦርነቱን በድል ለማጠናቀቅ ሴቶች የድርሻችንን እንወጣለን” ብለዋል::

እንደ ሀገር የገጠመንን ፈተና ለመወጣት የዞኑ ማኅበረሰብ ከጀግናው የሀገር መከላከያ ሠራዊት፣ ልዩ ኀይልና ሚሊሻ ጎን በመቆም ሁለንተናዊ ድጋፍ እያደረገ እንደሚገኝ የገለጹት ደግሞ የምዕራብ ጎጃም ዞን ዋና አስተዳዳሪ ስሜነህ አያሌው ናቸው።

ዞኑ የሚሊሻ አባላትን ወደ ግንባር የላከ ሲኾን ለጸጥታ ኀይሉ በሁለት ዙር በጥሬ ገንዘብ እና በአይነት ሀብት በማሰባሰብ የላከ መኾኑን አስታውቀዋል:: እንደ ዞን 456 ሚሊዮን በአይነትና በጥሬ ገንዘብ ሀብት ለመሰብሰብ ታቅዶ እስካሁን ከ 34 ሚሊዮን ብር በላይ በአይነትና በጥሬ ገንዘብ ሀብት ተሰብስቦ ገቢ መደረግ መቻሉን ገልጸዋል።

በአጭር ጊዜ ውስጥ እቅዱን ለማሳካት ርብርብ እየተደረገ መሆኑን የገለጹት ዋና አስተዳዳሪው አሁን ላይ በዞኑ በሁሉም ወረዳዎች በሴቶችና በወጣቶች አደረጃጀት የተዘጋጀ በአይነት ደረቅ ሬሽ ተሰብስቦ ወደ ግንባር ለሁለተኛ ዙር መላኩን ተናግረዋል::

አሁን ላይ ከ200 ኩንታል በላይ ደረቅ ሬሽን፣ 2ሺህ ሊትር በላይ ዉኃ እና በአይነት በየወረዳው ተዘጋጅቶ ወደ ግንባር በመጓጓዝ ላይ ነውም ብለዋል:: የሀብት ማሰባሠቡ ይቀጥላል ያሉት አቶ ስሜነህ ሕዝቡ ሰርጎ ገቦች ሊኖሩ ስለሚችሉ አካባቢውን በንቃት እንዲጠብቅ አሳስበዋል፡፡

ዘጋቢ፦ ዘመኑ ይርጋ – ከፍኖተ ሰላም

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡
ዩቱዩብ https://bit.ly/2RnNHCq
በዌብሳይት amharaweb.com
በቴሌግራም https://bit.ly/2wdQpiZ
ትዊተር https://bit.ly/37m6a4m