የማይበገረው “ላ ስካሎኔታ” እና አሠልጣኝ ሊዮኔል ስካሎኒ

የአርጀንቲና ብሔራዊ ቡድን ዋና አሠልጣኝ ሊዮኔል ስካሎኒ፣ በእግር ኳስ ታሪክ ውስጥ የማይታመን እና አዲስ ታሪካዊ አስመዝግበዋል።

አሠልጣኙ ቡድኑን ከተረከቡበት ጊዜ አንስቶ ባሉት ስድስት ዓለም አቀፍ ውድድሮች፣ በአምስት የተለያዩ የፍጻሜ ጨዋታዎች ላይ በመድረስ የዘመናችን የላቀ የስልት መሐንዲስ መኾናቸውን በተግባር አረጋግጠዋል።

በእሳቸው ስልታዊ አመራር ስር “ላ ስካሎኔታ” የሚል ቅጽል ስም የተሰጠው የአርጀንቲና ብሔራዊ ቡድን፣ በቅርብ ዓመታት ውስጥ የዓለም እግር ኳስን በበላይነት መቆጣጠር ችሏል።

የአርጀንቲና አስደናቂ የፍጻሜ ጉዞዎች፦

ፋይናልሲማ 2022፡ የአውሮፓን ሻምፒዮን ጣልያንን 3 ለ 0 በማሸነፍ፣ ስካሎኒ በአህጉራት መካከል ያለውን የክህሎት ልዩነት ያሳየበት ጨዋታ ተጠቃሽ ነው።

የዓለም ዋንጫ 2022 (ኳታር)፡ አርጀንቲና ለሦስተኛ ጊዜ የዓለም ዋንጫን ያነሳችበት እና በሊዮኔል ሜሲ መሪነት የታሪክ ማክተሚያ የተጻፈበት ውድድር ሌላው ስኬቷ ነው።

ኮፓ አሜሪካ 2024፡ ሀገሪቱ የአህጉራዊ የበላይነቷን በድጋሚ ያስመሰከረችበት እና ክብሯን ያስጠበቀችበት ጨዋታ ነው።

የዓለም ዋንጫ 2026፡ በግማሽ ፍጻሜው ጠንካራዋን እንግሊዝን 2 ለ 1 በማሸነፍ፣ ስካሎኒ በስድስት ውድድሮች ውስጥ አምስተኛ ለፍጻሜ የመድረስ አስደናቂ ክብረ ወሰን አስመዝግቧል።

የስኬቱ ምስጢር ምንድነው?

የስፖርት ተንታኞች እንደሚገልጹት፣ የስካሎኒ ስኬት መሰረት ከተጫዋቾች ጋር ያለው ጠንካራ መስተጋብር እና የቡድን አንድነት ነው። በተለይም ሊዮኔል ሜሲን ማዕከል ያደረገው የጨዋታ ፍልስፍናው፣ ሜሲ በሜዳ ላይ ሙሉ ነፃነት እና ልበ ሙሉነት እንዲኖረው አድርጓል። ይህንን ተከትሎም የተደረጉ ውጤታማ የታክቲክ ለውጦች ቡድኑን ለስኬት አብቅተዋል።

እንግሊዝን ያሸነፉበት የ2026ቱ የግማሽ ፍጻሜ ጨዋታም ስካሎኒ በቡድኑ ውስጥ የገነባው የአሸናፊነት መንፈስ፣ ጫናን የመቋቋም ብቃት እና ስልታዊ ጥንካሬ ማሳያ ነው።

በእግር ኳስ ታሪክ ውስጥ እንዲህ ያለ ወጥ የኾነ የፍጻሜ ጉዞ መፍጠር መቻል ስካሎኒን በታሪክ ውስጥ ከታዩ ምርጥ አሠልጣኞች ተርታ በግንባር ቀደምትነት ያሰልፈዋል። አርጀንቲናውያንም ሀገራቸው በዓለም እግር ኳስ ማማ ላይ እንድትቆይ ላደረጉት ለዚህ ታላቅ አሠልጣኝ ከፍተኛ አክብሮት እና ምሥጋና እየለገሱ ይገኛሉ።

#አሚኮ #Argentina #LionelScaloni

#ባሕር_ዳር ሐምሌ 09/2018 ዓ.ም

ጥበቡ ሰለሞን

የአሚኮ ዲጂታል ሚዲያ ቤተሰብ ይሁኑ!