🏆 ⚽️ የክብሩን ዘውድ ማን ይጭነዋል ?

ባሕር ዳር: ግንቦት 22/2018 ዓ.ም (አሚኮ) አርሰናል በታሪኩ ለመጀመሪያ ጊዜ፣ ፒኤስጂ ደግሞ በታሪኩ ለሁለተኛ ጊዜ የአውሮፓ ሻምፒዮንስ ሊግ ዋንጫን ለማሸነፍ ይፋለማሉ። አሁን ሚሊዮኖች ወደ ሀንጋሪዋ ዋና ከተማ ቡዳፔስት ዓይናቸውን አዙረዋል። የአውሮፓ አሸናፊውን ክለብ የሚለየውን ጨዋታ ለመመልከት።

ፔኤስጂ በተከታታይ ዓመታት ዋንጫውን ከፍ ለማድረግ ቡዳፔስት ደርሷል። የእንግሊዝ ፕሪምዬር ሊግን ከ22 ዓመታት በኋላ ያሸነፈው አርሰናል ደግሞ ለሌላ ትልቅ ዋንጫ ወደ ቡዳፔስት አቅንቷል። አርሰናል በታሪኩ ለሁለተኛ ጊዜ ነው ለአውሮፓ ሻምፒዮናው ሊግ ፍጻሜ የደረሰው። ለመጀመሪያ ጊዜ ለፍጻሜ ደርሶ የነበረው እ.አ.አ በ2006 ነበር። አሁን ከ20 ዓመታት በኋላ ለሁለተኛ ጊዜ ለፍጻሜ ደርሷል።

አርሰናል የዛሬውን ጨዋታ የሚያሸንፍ ከኾነ የአውሮፓ ውድድሮችን ሁሉ የእንግሊዝ ክለቦች ያሸነፉበት ታሪክ ይጽፋሉ። የዩሮፓ ሊግ ዋንጫን አስቶንቪላ፣ የዩሮፓ ኮንፈረንስ ሊግ ዋንጫን ክርስቲያል ፓላሰ አሸንፈዋል። አርሰናል ዛሬ ዋንጫውን የሚያሸንፍ ከኾነ የአውሮፓ ታላላቅ ዋንጫዎች ሁሉም ወደ እንግሊዝ ያቀናሉ።

ዛሬ በአውሮፓ ሻምፒዮናስ ሊግ ፍጻሜ የሚፋለሙት ሁለቱ ክለቦች ባለፈው ዓመት በአውሮፓ ሻምፒዮንስ ሊግ ግማሽ ፍጻሜ ጨዋታ ላይ ተገናኝተው ነበር። ፒኤስጂ በሜዳው እና ከሜዳው ውጭ አርሰናልን በማሸነፍ ወደ ፍጻሜ መድረሱን ቢቢሲ አስታውሷል። በፍጻሜው ጨዋታም ድል በማድረግ በታሪኩ ለመጀመሪያ ጊዜ የአውሮፓ ሻምፒዮንስ ሊግ ዋንጫን አሸንፏል።

አርሰናል በዛሬው ጨዋታ ድል የሚቀናው ከኾነ የአውሮፓ ሻምፒዮንስ ሊግ ዋንጫን ያሸነፈ 25ኛው ክለብ ይኾናል። በእንግሊዝ ደግሞ የአውሮፓ ሻምፒዮንስ ሊግን ያሸነፈ ሰባተኛው ክለብ እንደሚኾን ቢቢሲ ዘግቧል።

እስካሁን ስድስት የእንግሊዝ ክለቦች የአውሮፓ ሻምፒዮንስ ሊግ ዋንጫን በማሸነፍ ቀዳሚዎች ናቸው። ከእንግሊዝ ውጭ ሌላ ሀገር ከሦስት የተለያዩ ክለቦች በላይ የአውሮፓ ሻምፒዮንስ ሊግ ዋንጫን ያሳካ የለም።

ያለ ምንም ዋንጫ በርካታ የአህጉራዊ ውድድሮችን ያደረገው አርሰናል ይሄን መጥፎ ታሪኩን ዛሬ ይሽረው ይኾን ? የሚለው ይጠበቃል።

አርሰናል በዘንድሮው የአውሮፓ ሻምፒዮንስ ሊግ ውድድር ያልተሸነፈ ብቸኛው ክለብ ነው። ዋንጫውን ለማሸነፍም ትክክለኛው ጊዜ ላይ ያለ ይመስላል።

ኢኤስፒኤን በዘገባው በአውሮፓ እግር ኳስ ምርጥ የማጥቃት እግር ኳስ የሚጫወተው ፒኤስጂ እና ምርጥ የመከላከል ጨዋታ የሚጫወተው አርሰናል በፍጻሜው ይገናኛሉ ይላል። ሁለት የተለያየ የአጨዋወት ስልት ያላቸው ክለቦች የሚያደርጉት ጨዋታ በጉጉት እንደሚጠበቅም ገልጸዋል።

የሁለቱን ክለቦች ብቃት ሲገልጽ የማይገታው ኃይል ከማይንቀሳቀሰው አካል ጋር የሚጋጭበት ተደርጎ ይወሰዳል ይላል።

ቢሶከር በዘገባው ፒኤስጂ የሻምፒዮንስ ሊግ ዘውዳቸውን ለማስጠበቅ ዛሬ ትልቁን ፈተና ይጋፈጣሉ ብሏል። ታሪካዊ የኾነውን ተከታታይ የሻምፒዮንስ ሊግ ድል ለመቀዳጀት አርሰናልን ማሸነፍ ይጠበቅባቸዋል። አርሰናልም የከብሩን ዘውድ ለመድፋት ይፋለማል።

የፒኤስጂውን አሠልጣኝ ሉዊስ ኤንሪኬ በሻምፒዮንስ ሊግ ፍጻሜ ላይ ከመወዳደር የበለጠ ትልቅ የማነቃቂያ ምንጭ የለም። ሌላው ነገር ሁሉ ከዚህ ጋር ሲነጻጸር ምንም ማለት ነው። ምርጥ ብቃት ማሳየት አለብን ብለዋል።

አርሰናሎች የዘንድሮውን የፕሪምዬር ሊግ ዋንጫ ድላቸው ለእኔ ምንም አያስደንቅም፤ ሙሉ በሙሉ የሚገባቸው አሸናፊዎች ናቸው፤ አስደናቂ የኾነ ወጥ አቋም አሳይተዋል፤ አሠልጣኝ ሚኬል አርቴታ በዚህ ክለብ ውስጥ የገነቡት ማንነት አሁን በግልጽ የሚታይ ኾኗል ብለዋል።

ባለፈው ዓመት ታሪክ ሠርተናል፤ ነገር ግን ዓላማችን ጽኑ ነው፤ እርሱም ራሳችንን ለረጅም ጊዜ በዓለም አቀፍ ታላላቅ ክለቦች ተርታ ማሰለፍ ነው፤ በድጋሚ ለፍጻሜ ደርሰናል፤ ይህ ለሁሉም ሰው ትልቅ ስኬት ነው፤ ለክለቡም ታሪካዊ ምዕራፍ ነው ብለዋል።

ለፍጻሜ ጨዋታ የተለየ ዝግጅት እንደሚያስፈልግ የተናገሩት አሠልጣኝ ሉዊስ ኤንሪኬ እንደዚህ አይነት አጋጣሚዎችን በአግባቡ መጠቀም ይገባል፤ እንዲህ አይነቱ ዕድል መቼ በድጋሜ እንደሚገኝ አይታወቅምና ነው ያሉት።

የአርሰናሉ አምበል ማርቲን ኦዲጋርድ ደግሞ ከ22 ዓመታት የዋንጫ ድርቅ በኋላ የፕሪምዬር ሊጉን ዋንጫ በድጋሚ አስመልሰናል፤ አሳክተነዋልም። ታሪክ መሥራታችንን መቀጠል እንፈልጋለን። ዋንጫ ማንሳት አስደናቂ ስሜት አለው፣ ይህም ለተጨማሪ ስኬት የበለጠ እንዲርበን ያደርገናል ብሏል።

በአርሰናል ታሪክ የአውሮፓ ሻምፒዮንስ ሊግን ወደ ኤምሬትስ ስታዲየም ለማምጣት ያለውን ተስፋም ገልጿል።

የአርሰናሉ አሠልጣኝ ሚኬል አርቴታ ቡድናቸው በጥሩ ዝግጅት ላይ እንደኾነ ገልጸዋል። ዋንጫውን ወደ ለንደን ለማምጣት እንደሚጫወቱም ተናግረዋል። የዛሬው ጨዋታ በእግር ኳስ ትልቁ ጨዋታ እንደኾነ እናውቃለን፤ የዚህ ክብር ታሪክ ባለቤት መኾን እንፈልጋለን ነው ያሉት።

በታሪካችን ውስጥ ለሁለተኛ ጊዜ እዚህ ስንመጣ በክለቡ ታሪክ ውስጥ አዲስ ታሪክ ለመጻፍ ነው። አዲስ ታሪክ ለመጻፍ እንደተቃረብን እናምናለን ብለዋል።

ዛሬ የክብሩን ዘውድ ማን ይጭናል ? አርሰናል ወይስ ፒኤስጂ በጉጉት ይጠበቃል። ይህ አጓጊ የፍጻሜ ጨዋታ በሀንጋሪ ፑሽካሽ አሬና ምሽት 1:00 ላይ ይካሄዳል።

በታርቆ ክንዴ

#አሚኮ-ዜና #ስፖርት#

የአሚኮ ዲጅታል ቤተሰብ ይሁኑ

https://linktr.ee/Amharamediacorporations

ለኅብረተሰብ ለውጥ እንተጋለን !