የደብረ ታቦር ዩኒቨርሲቲ የጋፋት ኢንዱስትሪ መንደርን ለማልማት እና ታሪኩን በሰፊው ለማስተዋወቅ እየሠራ መሆኑን አስታወቀ፡፡

ከክርስቶስ ሰምራ እስከ ደብረ እንቁ፣ ከማኅደረ ማሪያም እስከ ግንብ ጊዮርጊስ፣ ከቤተልሔም እስከ ዙር አምባ ማሪያም፣ ከፈሳስ ላልይበላ እስከ ቆማ ፋሲለ ደስ፣ ከብሯደጌ አስከ ጣራ ገዳም፣ ከአምስትያ እስከ ጉና በዞኑ ካሉ የቱሪስት መዳረሻዎች ብዙ ያልተጎበኙ የዞኑ የመስህብ ሀብቶች ናቸው፡፡ “ዞኑ የበርካታ ጥንታዊ እና ታሪካዊ ቅርሶች ባለቤት ነው” ያሉት የዞኑ ባህል እና ቱሪዝም መምሪያ የቅርስ ጥበቃና ቱሪዝም ልማት ቡድን መሪ ገደፋው ወርቁ ናቸው፡፡ በመካከለኛው ዘመን በአፄ ሰርፀ ድንግል የተመሠረተቸውን ጥንታዊ እና ታሪካዊ ይዘት ያላትን ማኅደረ ማርያም እና ግንብ ጊዮርጊስ ተጎብኝተዋል፡፡ ማኅደረ ማሪያም በፋርጣ ወረዳ ስትገኝ ግንብ ጊዮርጊስ ደግሞ በአንዳቤት ወረዳ ይገኛሉ፡፡ መምሪያው በዞኑ ያሉ የቱሪስት መዳረሻዎችን በማልማት ከዘርፉ ተጠቃሚ ለመሆን እየሠራ መሆኑንም አቶ ገደፋው ጠቁመዋል፡፡

በደብረ ታቦር ዩኒቨርሲቲ የቱሪዝም ልማት ትምህርት ክፍል ኃላፊ ዳኛቸው ነጋ ዞኑ የበርካታ ቅርሶች ባለቤት መሆኑን አውስተው፤ ነገር ግን በተገቢው መንገድ ለቀሪው ዓለም እንዳልተዋወቀም ጠቅሰዋል፡፡ የደብረ ታቦር ዩኒቨርሲቲ የጋፋት ኢንዱስትሪ መንደርን ለማልማት እና ታሪኩን በሰፊው ለማስተዋወቅ ከሌሎች ዩኒቨርሲቲዎችና ከሚመለከታቸው አጋር አካላት ጋር እየሠራ መሆኑንም ጠቁመዋል፡፡

ድጋፍ ለሚያስፈልጋቸው መዳረሻዎች ድጋፍ እና ጥገና ለሚያስፈልጋቸው ቅርሶች በዕውቀት ላይ ተመሥርቶ ጥገና ለማድረግ በቅርበት እየተሠራ መሆኑንም አቶ ዳኛቸው ጠቁመዋል፡፡

ዘጋቢ፡-ታዘብ አራጋው