መንግሥት የሠራተኞችን የመኖሪያ ቤት ችግር ለመፍታት ያደረገውን ጥናት ማጠናቀቁን የሲቪል ሰርቪስ ኮሚሽን አስታወቀ።

የሲቪል ሰርቪስ ኮሚሽነር በዛብህ ገብረየስ ለኢዜአ እንደገለጹት በቤት ኪራይ ዋጋ መናር ቀጥተኛ ተጎጂ ከሚሆኑ ዜጎች መካከል ዝቅተኛ ደመወዝ የሚከፈላቸው የመንግሥት ሠራተኞች ይጠቀሳሉ።

ሠራተኞቹ ገቢያቸውን በሙሉ ለቤት ኪራይ ስለሚያውሉ ምግብና ሌሎች አገልግሎቶችን ለመሸፈን እንደሚቸገሩ አስረድተዋል።

ችግሩን ይፈታል የተባለ ጥናት ኮሚሽኑ ከከተማ ልማት ቤቶች ኮንስትራክሽን ሚኒስቴር ጋር በመሆን ጥናት ማስጠናቱንና ጥናቱም በቅርቡ ለመንግሥት እንደሚቀርብ ገልጸዋል።

”በዋነኛነት ለረጅም ዓመታት በመንግሥት መሥሪያ ቤቶች ሲሰሩ ከእጅ ወደ አፍ በሆነ ደመዝ የሚኖሩ ሰዎች አሁን ላይ ከተፈጠረው የመኖሪያ ቤት ኪራይ ዋጋ መናርና ሌሎችም ተያያዥ ችግሮች ጋር ተያይዞ የሚበሉበትን እስከማጣት የሚደርሱ መሆናቸውን ጥናቶቻችን አሳይተውናል” ብለዋል ኮሚሽነሩ።