የጤና አገልግሎት ግንዛቤ ፈጠራ ሥራዎች ውጤት ሊያመጡ በሚችል መልኩ ተጠናክረው መቀጠል እንዳለባቸው ቋሚ ኮሚቴው አሳሰበ፡፡

የኮሮናቫይረስ ስርጭትን ለመከላከል በተለይም ክልሉን በሚያዋስኑ የድንበር አካባቢዎች የቤት ለቤት ቅኝት እና ግንዛቤ ፈጠራ ሥራዎች አፈፃፀም በዝርዝር ታይቷል፡፡ በምዕራብ ጎንደር ዞን እና በአፋር ክልል አዋሳኝ ስፍራዎች የተሠሩ የቅድመ መከላከል ሥራዎች ፈታኝ እንደነበሩም ለቋሚ ኮሚቴው ቀርቧል፡፡ በክልሉ 45 የለይቶ ማቆያና የለይቶ ማከሚያ ማዕከላት ዝግጅት መደረጉም በሪፖርቱ ቀርቧል፡፡ በመጀመሪያዎቹ ሳምንታት አካባቢ ማዕከላቱ ውስንነት የነበረባቸው እና በበቂ ያልተዘጋጁም እንደነበሩም ተጠቅሷል፡፡ በክልሉ ያሉ አብዛኞቹ የለይቶ ሕክምና ማዕከላት የከፍተኛ ትምህርት ተቋማት እንደነበሩ ምክትል ኃላፊው ገልጸዋል፡፡ በምዕራብ ጎንደር ዞን አካባቢ የከፍተኛ ትምህርት ተቋም አለመኖርና ያለው የለይቶ ማቆያ ከውጪ ከሚገባው የሰው ብዛት ጋር አለመጣጣሙ ለችግሩ መባባስ ምክንያት እንደበረም ጠቅሰዋል፡፡

ቫይረሱ በክልሉ መከሰቱ በታወቀባቸው የመጀመሪያዎቹ ሳምንታት ሙሉ ኃይሉን የኮሮናቫይረስን መከላከል ላይ በማድረጉ በመሠረታዊ የጤና አገልግሎቶች ላይ ክፍተቶች ተፈጥረው እንደነበርም ምክትል ኃላፊው አንስተዋል፡፡ በጤና መሠረተ ልማት ግንባታ መጓተት እና በግብዓት አቅርቦቶች ላይ የነበሩ ውስንነቶችም ለቋሚ ኮሚቴው ቀርበዋል፡፡

የክልሉን ጤና ቢሮ ዝርዝር አፈፃፀም ሪፖርት የሰሙት የምክር ቤቱ የሰው ሀብት እና ቱሪዝም ልማት ጉዳዮች ቋሚ ኮሚቴ አባላት መስተካከል አለባቸው ያሏቸውን ጉዳዮች በዝርዝር አቅርበዋል፡፡ የቋሚ ኮሚቴው ሰብሳቢ ፋንቱ ተስፋዬ በተለይም የኮሮናቫይረስ ስርጭትን ለመከላከል የሚያስችል የግንዛቤ ፈጠራ ሥራ ውጤት ሊያመጣ በሚችል መልኩ ሊቀጥል እንደሚገባ አሳስበዋል፡፡ በበርካታ አካባቢዎች ማኅበረሰቡ ስለቫይረሱ ያለው ግንዛቤ ውስንነቶች እንዳሉበት የጠቀሱት ወይዘሮ ፋንቱ ውጤቱ በየጊዜው እየተገመገመ መመራት እንዳለበት አሳስበዋል፡፡

ቋሚ ኮሚቴው የምርመራ ማዕከላት ማስፋፊያ እና የጤና ባለሙያዎች ጥያቄ የክልሉ አቅም በሚፈቅደው ልክ እንዲጠናከር አቅጣጫ አስቀምጧል፡፡ የግብዓት ስርጭት ፍትሐዊነት እና ቅድሚያ የሚሰጣቸው ጉዳዮች እየተለዩ ሊሠሩ እንደሚገባም ጠቁሟል፡፡
በመሠሰረታዊ የጤና አገልግሎት በተለይም የእናቶች እና ሕጻናት ክትትል፣ የኤች አይ ቪ (ኤድስ) እና መሰል መሠረታዊ የጤና ሥራዎች ትኩረት ሊሰጣቸው እንደሚገባም በቋሚ ኮሚቴው አባላት ተጠቁሟል፡፡ የጤና መሠረተ ልማት ግንባታ ችግሮች እየተለዩ የገንዘብ እና ኢኮኖሚ ልማት ቢሮ እና ባለድርሻ አካላት ጋር ውይይት እየተካሄደ መፍትሔ ሊቀመጥላቸው እንደሚገባም አሳስቧል፡፡

ዘጋቢ፡- ታዘብ አራጋው

ተጨማሪ መረጃዎችን
በቴሌግራም https://bit.ly/2wdQpiZ
ትዊተር https://bit.ly/37m6a4m
ዩቱዩብ https://bit.ly/38mpvDC ያገኛሉ፡፡