የመንግሥትን የሰላም ጥሪ የተቀበሉ እና በጠዳ የሥልጠና ማዕከል የቆዩ ታጣቂዎች ሥልጠናቸውን አጠናቀቁ።

‎

‎በጠዳ የሥልጠና ማዕከል ሲሠለጥኑ የቆዩ ሠልጣኞች ለሰላም መስፈን የነበራቸውን ቁርጠኝነት በሥልጠናው ወቅት ማሳየታቸውን በማጠናቀቂያ መርሐ ግብሩ የአማራ ክልል ሰላም እና ጸጥታ ቢሮ ምክትል ኀላፊ በሪሁን መንግሥቱ ገልጸዋል።

‎

‎የብሔራዊ ተሃድሶ ኮሚሽን በሀገሪቱ በትጥቅ ትግል ላይ የሚገኙ ወገኖችን ወደ ማኅበረሰቡ እንዲቀላቀሉ በማድረግ ዘርፈ ብዙ ተግባራትን እያከናወነ እንደሚገኝም አቶ በሪሁን አንስተዋል።

‎

‎የአማራ ክልል መንግሥት ሰላምን ለማረጋገጥ እየሠራ መኾኑን ያነሱት አቶ በሪሁን መንግሥቱ ለሰላም መስፈን ሁሉም ሊተባበር ይገባል ብለዋል።

‎

‎የብሔራዊ ተሐድሶ ኮሚሽን በሀገሪቱ ሰላም እንዲረጋገጥ በትኩረት እየሠራ እንደሚገኝ የኮሚሽኑ የጠዳ ማዕከል አሥተባባሪ አቶ ግዛቸው መኩሪያ ተናግረዋል። ‎ሰላም እና ዴሞክራሲ እንዲሰፍን የብሔራዊ ተሐድሶ ኮሚሽን ኀላፊነቱን እየተወጣ ይገኛልም ብለዋል።

‎

‎በስልጠናው የተገኙ ሀሳቦችን በግብዓትነት በመጠቀም ‎መንግሥትም፣ ኮሚሽኑም ይጠቀምባቸዋልም ብለዋል አቶ ግዛቸው። በጫካ የሚገኙ ወገኖች ለሰላም እጃቸውን እንዲዘረጉም ጥሪ አቅርበዋል።

‎ሰልጣኞች በበኩላቸው በሥልጠና ማዕከሉ ቆይታቸው በተሰጡ ሥልጠናዎች የአመለካከት ለውጥ ማምጣታቸውን አንስተዋል። ያገኙትን እውቀት በመጠቀም ሰላም እንዲሰፍን የሚጠበቅባቸውን ኀላፊነት እንደሚወጡም ተናግረዋል።

ዘጋቢ:- ‎ደስታ ካሳ

ለኅብረተሰብ ለውጥ እንተጋለን