በኢትዮጵያና ሱዳን ድንበር አካባቢ የሚስተዋሉ ችግሮችን በሰላማዊ መንገድ ብቻ እንደሚፈቱ ጠቅላይ ሚኒስትር ዐብይ አሕመድ አስታወቁ፡፡

በሱዳን በኩልም ተመሳሳይ ጥያቄ ስለሚነሳ ችግሩን በድርድር ለመፍታት ጥረት እየተደረገ መሆኑንም አብራርተዋል፡፡ ባስ ካለም ጉዳዩን ወደ አፍሪካ ኅብረት ማምጣት እንደሚቻል አስታውቀዋል፡፡ ነገር ግን ሁለቱን ሀገራት ወደ ጦርነት ለማስገባት እየሠሩ ያሉ አካላት እንዳሉም ጠቅላይ ሚንስትሩ ጠቁመዋል፡፡ ችግሩ በሰላማዊ መንገድ እንደሚፈታና ኢትዮጵያም ሙሉ ትኩረቷን ሕዳሴ ግድብ ላይ አድርጋ እንደምትሠራም አስታውቀዋል፡፡

በሌላ በኩል አምነስቲ ኢንተርናሽናል በኢትዮጵያ ዙሪያ በቅርቡ ያወጣውን ሪፖርት በተመለከተም የዜጎች ሰብዓዊ መብት እንዲከበር የሚያሳስብ በመሆኑ ማጣራት እንደሚገባ ገልጸዋል፡፡ መንግሥትን የሚጠይቀው እና የሚገመግመው የስልጣን ባለቤት የሆነው ሕዝብ ብቻ መሆኑንም ተናግረዋል፡፡

በየማነብርሃን ጌታቸው