ሕዝብ በሚበዛባቸው ቦታዎች የአፍና አፍንጫ መሸፈኛ ጭምብል መልበስ መዘንጋት እንደሌለበት የዓለም ጤና ድርጅት አሳሰበ፡፡

የኮሮናቫይረስ በማኅበረሰቡ ውስጥ በተሠራጨባቸው አካባቢዎች የሚሠሩ ሁሉም የጤና ባለሙያዎች ለሕክምና ባለሙያዎች የተዘጋጁ የአፍና አፍንጫ መሸፈኛ ጭምብሎችን ሊጠቀሙ እንደሚገባም የዓለም ጤና ድርጅት አሳስቧል፡፡ በመሆኑም በእነዚህ አካባቢዎች የሕክምና ባለሙያዎችን ጭምብል በጠቀም ያለባቸው በቀጥታ የኮሮናቫይረስ ሕሙማንን የሚንከባከቡ ሐኪሞች ብቻ አለመሆናቸውን ዋና ዳይሬክተሩ አስገንዝበዋል፡፡

መሸፈኛዎቹ ከአፍና አፍንጫ የሚወጡ ነጠብጣቦች ወደ ጤነኛ ሰዎች እንዳይገቡ ለማገድ ስለሚረዱ አንዳንድ ሀገራት ሕዝብ በሚሰበሰብባቸው ቦታዎች ጭምብል እንዲለበስ ቀድመው ማሳሰባቸውንም ዶክተር ቴድሮስ ተናግረዋል፡፡

በመሆኑም ቫይረሱ በማኅበረሰቡ ውስጥ በተሰራጨባቸው ቦታዎች እና አካላዊ ርቀትን መጠበቅ በማይቻልበት ሁኔታ ማስክ መጠቀም ተገቢ መሆኑን ዋና ዳይሬክተሩ አስገንዝበዋል፡፡ በተለይ ዕድሜያቸው 60 እና ከዚያ በላይ የሆኑት ወይም የጤና እክል ያለባቸው ደግሞ ለሕክምና የሚያገለግሉ አፍና አፍንጫ መሸፈኛ ጭምብሎችን እንዲለብሱ መክረዋል፡፡

የአፍና አፍንጫ መሸፈኛዎችን መልበስ አንድ የመከላከያ መንገድ መሆኑን ያስታዎሱት ዶክተር ቴድሮስ አካላዊ ርቀትን እና የእጅ ንጽሕናን መጠበቅ ላይ መዘናጋት እንደማይገባም አሳስበዋል፡፡

የጆንስ ሆፕኪንስ ዩኒቨርሲቲ መረጃ እንደሚያመለክተው በዓለማችን 6 ሚሊዮን 852 ሺህ 838 ሰዎች በኮሮና ቫይረስ ተይዘዋል፤ 398 ሺህ 286 ሕይወታቸውን አጥተዋል፤ 3 ሚሊዮን 352 ሺህ 731 ሰዎች ደግሞ አገግመዋል፡፡

ምንጭ፡- የዓለም ጤና ድርጅት ማኅበራዊ ትሥሥር ገጽ

በኪሩቤል ተሾመ

ተጨማሪ መረጃዎችን
በቴሌግራም https://bit.ly/2wdQpiZ
ትዊተር https://bit.ly/37m6a4m
ዩቱዩብ https://bit.ly/38mpvDC ያገኛሉ፡፡