የአረንጓዴ አሻራ መርሀ ግብር ተጀመረ፡፡

‘‘እንደሌላው ዓለም ሁሉ ኢትዮጵያም በአየር ንብረት ለውጥና በአካባቢ መራቆት እየተጎዳች ነው፤ እነዚህ ደግሞ ለአፈር መከላት፣ ጎርፍ፣ ድርቅና ሥነ ምኅደር መዛባት ያጋልጣል፤ ስለሆነም ይህንን ለውጥ መመከት የኛ ሥራ ሆኗል፤ ለዚህም ነው የአረንጓዴ አሻራ መርሀ ግብርን የምንጀምረው፡፡ ይህም በአራት ዓመታት የምንተክለው የ20 ቢሊዮን ችግኝ አካል ነው’’ ብለዋል ጠቅላይ ሚኒስትር ዐብይ በመልእክታቸው፡፡

ባለፈው ዓመት ከተተከሉት የአረንጓዴ አሻራ ችግኞች 84 ከመቶ መጽደቃቸውን ያስታወሱት ዶክተር ዐብይ በዘንድሮው መርሀ ግብርም የፌዴራልና የክልል መንግሥታት ቅንጅት ግቡን ለማሳካት በሚያስችል ጥምረት ላይ መሆኑን አስታውቀዋል፡፡

‘‘ዓለማቀፉ ማኅበረሰብ የዓለም አካባቢ ቀንን ሲያከብር የኢትዮጵያን አረንጓዴ አሻራ መርሀ ግብር በመደገፍ እንዲሆን ጥሪየን አቀርባለሁ፤ ራሳችንን ከኮሮና ወረርሽኝ እየጠበቅን አረንጓዴ አሻራችንን እናኑር’’ ብለዋል ዶክተር ዐብይ በመልእክታቸው፡፡

ይፋዊ የማስጀመሪያ ሥነ ሥርዓቶች በክልሎችና በፌዴራል ደረጃ በተለያዩ አካባቢዎች እንደሚኖሩም ታውቋል፡፡

በአብርሃም በዕውቀት