የከፍተኛ ትምህርትና ስልጠና ተማሪዎችና መምህራን ያለክፍያ በዲጂታል ቤተ መጽሐፍት እንዲጠቀሙ ተወሰነ፡፡

ሚኒስቴሩ እንደገለጸውም ትምህርት በኦንላይን ሲቀርብ የተማሪዎችን ኢኮኖሚያዊ አቅም በመገንዘብ በነፃ መጠቀም ለማስቻል ከኢትዮ ቴሌኮም ጋር እየተሠራ ነው፡፡

በዚህ መሠረትም ከዛሬ ግንቦት 24/2012 ዓ.ም ጀምሮ የሚኒስቴር መስሪያ ወዳዘጋጀው የዲጂታል ቤተ መጽሐፍት ተማሪዎችና መምህራን ገብተው ሲጠቀሙ ከከፍያ ነፃ እንዲሆን መወሰኑን አስታውቋል፡፡

የሳይንስና ከፍተኛ ትምህርት ሚኒስቴር ኢትዮ ቴሌኮም ላደረገው ከፍተኛ ድጋፍ አመስግኗል፡፡ የከፍተኛ ትምህርትና ስልጠና ተማሪዎችና መምህራንም በ http://ndl.ethernet.edu.et/ አድራሻ በመግባት የነፃ አገልግሎቱን እንዲጠቀሙ ሚኒስቴሩ በማኅበራዊ ትሥሥር ገጹ አስታውቋል፡፡ ተማሪዎችና መምህራን የኦንላይን መማር ማስተማር ሂደቱን በዚሁ አግባቡ እንዲቀጥሉም አሳስቧል፡፡

በኦንላይን ቤተ መጽሐፍቱ ከ80 ሺህ በላይ ማጣቀሻዎች፣ የመጀመሪያ ዓመት የዩኒቨርስቲ ተማሪዎች ሞጁሎች፣ በምስል የተደገፉ አጋዥ ማብራሪያዎች እንዲሁም የሁሉም የትምህርት ዓይነቶች መማሪዎች እንደሚገኙበትም ነው ሚኒስቴሩ የገለጸው፡፡