ሚዛኑን የሳተው የአምነስቲ ኢንተርናሽናል ሪፖርት እንዲስተካከል አብን ጠየቀ፡፡

ሪፖርቱ አምነስቲ ኢንተርናሽናል አራምዳቸዋለሁ ከሚላቸዉ ከእውነት፣ ከፍትሕና ከሰብዓዊነት መርሆዎች በተፃራሪ የተጠናቀረ መሆኑም ተቋሙ አለኝ ለሚለው አጠቃላይ ተዓማኒነት ትልቅ ፈተና እንደሚሆን ነው ንቅናቄው የገለጸው፡፡ ለአንድ ወገን ያዳላው ሪፖርቱ ደርጅቱን፣ ለሰብአዊ መብቶች መከበር በሃቅ ተግተው የሚሰሩ ወገኖችን እንዲሁም ጥቃት የደረሰባቸውን ወገኖች በእጅጉ ያሳዘነ መሆኑንም አብን በመግለጫው አስታውቋል፡፡

ከሚዛናዊነት መጓደል ባለፈ አምነስቲ ማካተት እየተገባው ያላካተታቸው ለአብነትም በሀገሪቱ የተለያዩ አካባቢዎች የንጹሃን ሕይዎት ያለፈባቸው ድርጊቶች፣ የደምቢዶሎ ዩኒቨርሲቲ ተማሪዎች እገታ፣ የዜጎች ማፈናቀልና እንግልቶች… መኖራቸውን ጠቅሷል፡፡ በተቋሙ ውስጥ ያለው የፖለቲካ አሰላለፍ ወገንተኝነትና በሴራ የተሰማሩ ግለሰቦች መኖራቸው ለዚህ ምክንያቶች መሆናቸውን እንደሚገነዘብም ንቅናቄው አመላክቷል፡፡

በዚህ ረገድ “አምነስቲ ኢንተርናሽናል” ጉዳዩን በጥልቀት በመመርመር ተገቢውን የእርምት እርምጃ ይወስዳል ብሎ ተስፋ እንደሚያደርግ አብን አስታውቋል፡፡ በመሆኑም የቀረበዉ ሪፖርት ያለበትን ጉልህ ስህተት እና ጥፋት በአግባቡ መርምሮ እና ተገንዝቦ የማያሰራ በሚል እንዲያነሳው እና በምትኩ በትክክል እና በገለልተኛ ሁኔታ ሪፖርቱን እንዲያጠናቅር የአማራ ብሔራዊ ንቅናቄ አሳስቧል፡፡

ንቅናቄው በዜጎች ላይ በየትኛውም አካባቢና ሁኔታ የሚፈፀሙ የሰብዓዊ መብት ጥሰቶች መቆም አንዳለባቸ በማሳሰብም ለዚህም የበኩሉን ለመወጣት ዝግጁ መሆኑን አስታውቋል፡፡