የወረርሽኙ ሥርጭት አሳሳቢ ደረጃ ላይ መድረሱን አማካሪ ግብረ ሃይሉ አስታወቀ፡፡

የኮሮናቫይረስ ወረርሽኝ መከላከል አማካሪ ግብረ-ሃይል አባላት በበኩላቸው ከጊዜ ወደ ጊዜ የሚስተዋለው የወረርሽኙ ስርጭት ፍጥነቱ እጅግ አሳሳቢ መሆኑን አስረድተዋል፡፡ በመላው ሃገሪቱ ከተመረመሩት መካከል 70 በመቶ የሚሆኑት ከአዲስ አበባ መሆናቸውን በመጥቀስም በመዲናዋ ወረርሽኙ በአሳሳቢ ደረጃ ስርጭቱ እየጨመረ መሆኑን አስገንዝበዋል፡፡

የወረርሽኙ ስርጭት በአዲስ አበባ ከተማ ብቻ የሚወሰን ባለመሆኑ ኅብረተሰቡ የጥንቃቄ ርምጃዎችን ሳይዘናጋ ተግባራዊ ማድረግ እንዳለበትም የአማካሪ ግብረ ሃይሉ አባላት አሳስበዋል፡፡

መላው ኅብረተሰብ የወረርሽኙን ስርጭት አሳሳቢነት በመገንዘብ እጅን በየጊዜው በመታጠብ፣ አካላዊ ርቀትን ጠብቆ በመንቀሳቀስ እና የአፍና አፍንጫ መሸፈኛ በመጠቀም ወረርሽኙን እንዲከላከልም ጥሪ አቅርበዋል፡፡

ተጋላጭ ለሆኑ የኅብረተሰብ ክፍሎች የምርመራ ሥራው እንዲጠናከርና ችግሩን የሚመጥን የህግ ማስከበር ሥራ ተግባራዊ እንዲደረግም የአማካሪ ግብረ ሃይሉ አባላት መክረዋል፡፡

በጎ ፈቃደኛ ወጣቶች ስልጠና ተሰጥቷቸው ኅብረተሰቡን በማስተማር ሥራ እንዲሰማሩ ደግሞ የሚኒስትሮች ኮሚቴ አቅጣጫ ማስቀመጡን ከምክትል ጠቅላይ ሚኒስትሩ የማኅበራዊ ትሥሥር ገጽ ያገኘነው መረጃ ያመላክታል፡፡