ባሕር ዳር: የካቲት 16/2017 ዓ.ም (አሚኮ) ሰሞኑን በአለሁበት አካባቢ ብዙ ነገረን ባስተውልም አንድ ነገር ውስጤን አሁንም ድረስ ይከነክነኛል። ሩጠው ያልጠገቡ እኒያ ሕጻናት መገኛ ቦታቸው ላይ የሉም አካባቢው ጭር ብሏል። ለወትሮው እነዚህ አካባቢዎች የተማሪዎች መፈንጫ ነበሩ። አሁን ላይ እነዚያ የልጆች መጫወቻ እና መማሪያ ቁሶች ሳር አብቅሎባቸው አፈር በልቷቸው ለተመለከተ ውስጡ ማዘኑ አይቀርም። በዚያ ግቢ አሁን ላይ የሚሯሯጡ፣ ነጭ ጋወን የለበሱ መምህራን አይታዩም ይህ ክስተት አንገት ያስደፋል።
ትምህርት ቤቶች በማኅበረሰባችን ውስጥ የዕውቀት ማዕከል ብቻ አይደሉም። የወጣቶች የአዕምሮ እና የማኅበራዊ ዕድገት የሚዳብርባቸው ቦታዎች ናቸው።
ትምህርት ቤቶች ለተማሪዎች ከሌሎች ጋር ለመገናኘት እና ጓደኝነት ለመመስረት ዕድል ይሰጣሉ። ትምህርት ቤቶች ሲዘጉ ተማሪዎች ይገለላሉ፤ ይህ ደግሞ ጭንቀት እና የመንፈስ ጭንቀት ያስከትላል።
ትምህርት ቤቶች ሲዘጉ ወላጆች ልጆቻቸውን የሚንከባከቡበት ቦታ ያጣሉ፤ በተለይ የተለያዩ ሥራዎች ላለባቸው ወላጆች ትልቅ ችግር ይፈጥራል።
ትምህርት ቤቶች በማንኛውም ማኅበረሰብ ውስጥ የዕውቀት እና የሞራል ማዕከል ናቸው። ወጣቶች ዕውቀትን፣ ክህሎቶችን እና እሴቶችን የሚቀስሙት በእነዚህ ቦታዎች ነው። ትምህርት ቤቶች ሲዘጉ ግን ይህ ሁሉ ይቆማል ብቻ ሳይሆን የወደፊቱን ትውልድ አደጋ ላይ ይጥላል።
እኔ እንደ አንድ ሰው የትምህርት ቤቶች መዘጋት የሚያስከትለውን ችግር በቅርበት ተመልክቻለሁ። በተለይም በገጠራማ አካባቢዎች ያለው ሁኔታ በጣም አሳሳቢ ነው። ብዙ ልጆች ትምህርት ቤቶች በመዘጋታቸው ምክንያት ትምህርታቸውን አቋርጠዋል። ይህ ደግሞ ለወደፊት ሕይወታቸው ትልቅ እንቅፋት ይፈጥራል።
ትምህርት ቤቶች ሲዘጉ ተማሪዎች ብቻ አይደሉም የሚጎዱት። ቤተሰቦችም ትልቅ ችግር ውስጥ ይገባሉ። ብዙ ወላጆች ልጆቻቸውን የሚንከባከቡበት ቦታ ስለሌላቸው ሥራቸውን ለመተው ይገደዳሉ። ይህ ደግሞ የቤተሰብን የኑሮ ሁኔታ ማዛባቱ አይቀሬ ነው።
ከዚህም በላይ የትምህርት ቤቶች መዘጋት በሀገር ላይም ትልቅ ችግር ያስከትላል። ትምህርት የኢኮኖሚ እድገት መሰረት ነው። ትምህርት ቤቶች ሲዘጉ የሰው ኀይል እጥረት ይፈጠራል። ይህም በሀገሪቱ እድገት ላይ አሉታዊ ተጽዕኖ ያሳድራል።
ትምህርት የአንድ ሕዝብ የጀርባ አጥንት ነው። ዕውቀት የሰውን ልጅ ከድንቁርና ወደ ብርሃን፣ ከኋላቀርነት ወደ እድገት የሚመራ ብቸኛው መንገድ ነው።
በአማራ ክልል እየተከሰተ ያለው የትምህርት መቋረጥ አሳሳቢ ደረጃ ላይ ደርሷል። በተለያዩ ምክንያቶች ትምህርት ቤቶች ተዘግተዋል፣ ተማሪዎች ከመማሪያቸው ርቀዋል፣ መምህራን ተፈናቅለዋል። ይህ ሁኔታ በአንድ ትውልድ ላይ ሊያስከትል የሚችለው ጉዳት ቀላል አይደለም።
ትምህርት የተቋረጠበት ትውልድ፣ ነገን እንዴት አሻግሮ ሊያይ ይችላል? ያልተማረ ትውልድ፣ ሀገሩን እንዴት ይገነባል? የማያውቅ ትውልድ፣ ለለውጥ እንዴት ይነሳል? እነዚህ ጥያቄዎች፣ የትምህርት መቋረጥ የሚያስከትለውን አስከፊ መዘዝ በግልጽ ያሳያሉ።
ትምህርት ለወጣቱ ትውልድ ዕድል ነው። የተሻለ ሕይወት የመምራት፣ ዕውቀቱን እና ችሎታውን ለሀገሩ እና ለሕዝቡ የማበርከት ዕድል። ትምህርት ሲቋረጥ ግን ይህ ዕድል ይደፈጠጣል። ወጣቱ በጨለማ ውስጥ ተስፋ ቢስ ኾኖ ይቀራል።
ትምህርት የሀገር መሠረት ነው። ጠንካራ ሀገር ለመገንባት፣ የተማረና ዕውቀት ያለው ትውልድ ያስፈልጋል። ትምህርት ሲቋረጥ ግን የሀገር ግንባታው ይደናቀፋል።
ትምህርት የለውጥ ቁልፍ ነው። ለተሻለ ነገ፣ ለተሻለ ሕይወት፣ ለተሻለ ሀገር፣ ትምህርት ያስፈልጋል።
ትምህርት ሲቋረጥ ግን ለውጥ ይቆማል። ዕድገት ይገደባል። ወጣቱ፣ ለለውጥ የሚያነሳሳውን ዕውቀት እና መነሳሳት ከየትም ሊያገኝ አይችልም።
ትምህርት ሲቋረጥ፣ ትውልድ ይጎዳል። ሀገር ይጎዳል።
በአማራ ክልል ትምህርት መቋረጡን አስመልክቶ በተለይም የክልሉ የትምህርት ተሳትፎ በከፍተኛ ደረጃ ማሽቆልቆሉን እና ይህም በክልሉ ኾነ በሀገር ደረጃ ሊያስከትል የሚችለውን ዘርፈ ብዙ ችግር በሰፊው ሲነገር በክልሉ ምሁራን ሰምተናል።
ትምህርት የአንድ ሀገር የፖለቲካ፣ ኢኮኖሚያዊ፣ ማኅበራዊ እና ቴክኖሎጂያዊ እድገት መሰረት ነው። የተማረ ዜጋ በሌለበት፣ የሠለጠነ ፖለቲካዊ ሃሳብ ማመንጨት፣ አለያም ዓለም የደረሰበትን የኢኮኖሚ ዕድገት ማምጣት፣ ቴክኖሎጂዎችን መጠቀም እና ማዳበር፣ እንዲሁም ጤናማ ማኅበራዊ መስተጋብር መፍጠር ከባድ ነው። ይህ እውነታ ለአማራ ክልል ብቻ ሳይኾን ለመላው ኢትዮጵያ እጅግ አሳሳቢ ነው።
በአማራ ክልል ትምህርት መቋረጡ በርካታ ምክንያቶች አሉት። ከኮሮና ቫይረስ ወረርሽኝ ጀምሮ፣ በሕወሓት ጦርነት ምክንያት በተለያዩ አካባቢዎች የመማር ማስተማር ሂደቱ ተስተጓጉሏል። ከዚህም በላይ በክልሉ በተከሰተው ግጭት በርካታ ትምህርት ቤቶች ከአንድ ዓመት ተኩል በላይ ተዘግተዋል።
በ2017 የትምህርት ዘመን ብቻ 3ሺህ 736 ትምህርት ቤቶች ያልተከፈቱ ሲሆን ይህም ከ4 ነጥብ 5 ሚሊዮን በላይ ተማሪዎችን ከትምህርት ገበታ ውጭ አድርጓል።
ከ30ሺህ በላይ መምህራን እና የትምህርት ቤት ኀላፊዎችም ወደ ሥራቸው መመለስ አልቻሉም፤ ይህ እንደሀገር ውድቀት ነው።
ምንም እንኳን አሁን ላይ በአንጻራዊ ሁኔታ ሰላም ቢሰፍንም አሁንም ያልተከፈቱ ትምህርት ቤቶች አሉ። ይህ ሁኔታ ደግሞ በአማራ ክልል የተማሪዎች የትውልድ ቅብብሎሽ ላይ ትልቅ ችግር ፈጥሯል። ይህ ሁኔታ ለረጅም ጊዜ ከቀጠለ የክልሉ ብቻ ሳይኾን የሀገሪቱ የወደፊት እጣ ፈንታም አደጋ ላይ ይወድቃል።
የአማራ ክልል ምክር ቤት ይህንን ችግር በመገንዘብ የተለያዩ የውሳኔ ሃሳቦችን ማቅረቡንም ታዝቤአለው። ሁሉም የሚመለከታቸው አካላት ለጉዳዩ ትኩረት እንዲሰጡ ጥሪ ሲቀርብ አይተናል። በተለይም የትምህርት መሪዎች፣ ባለሙያዎች፣ መምህራን፣ የምክር ቤት አባላት እና የክልሉ መንግሥት እንዲሁም መላው ኅብረተሰብ ለትምህርት ጉዳይ ልዩ ትኩረት በመስጠት እና በጋራ በመሥራት ችግሩን እንዲፈቱ ሲጠየቅ ልብ ብለናል።
ዓለም አቀፋዊ የሰብአዊ መብት ተቋማትም በአማራ ክልል ሕጻናት የመማር መብት ላይ የተፈጠረውን ችግር በመገንዘብ ተማሪዎች ወደ ትምህርት ቤት እንዲመለሱ ለሚደረገው ጥረት ድጋፍ ሊሰጡ ግድ ይላል።
የአማራ ክልል ትምህርት ሲቋረጥ፣ የወደፊት ትውልድ ላይ ብቻ ሳይኾን በሀገሪቱ ዕድገት እና ብልጽግና ላይ የሚያስከትለው ተጽዕኖም ከፍተኛ ነው። ስለዚህ ሁሉም ዜጋ የዚህ ችግር አንድ አካል እንደኾነ ተሰምቶት ለትምህርት መነቃቃትና ለተሻለ ነገ ተባብሮ መሥራት ይኖርበታል እላለሁ።
በምሥጋናው ብርሃኔ
የአሚኮ ዲጂታል ሚዲያ ቤተሰብ ይሁኑ!
👇👇👇
https://linktr.ee/AmharaMediaCorporation
ለኅብረተሰብ ለውጥ እንተጋለን!
