ባሕር ዳር: የካቲት 16/2017 ዓ.ም (አሚኮ) በዚህ ሳምንት የካቲት 12/1929 ዓ.ም ጣሊያን ለበቀል ዳግም ኢትዮጵያን በወረረች ጊዜ በአዲስ አበባ የፋሺስት ጣሊያን አሥተዳደር ተወካይ በነበረው ማርሻል ሩዶልፍ ግራዚያኒ ላይ የግድያ ሙከራ ከተደረገ በኋላ በኢትዮጵያውያን ላይ የጅምላ ጭፍጨፋ ተፈጽሟል። ይህ ቀን በኢትዮጵያ የሰማዕታት መታሰቢያ ቀን በመባል ይታወሳል።
አብርሃ ደቦጭ እና ሞገስ አስገዶም የተባሉ ሁለት ኢትዮጵያውያን ማርሻል ሩዶልፍ ግራዚያኒን ለመግደል ቦምብ ወረወሩ። ይህ ሙከራ ግራዚያኒን ጨምሮ በቦታው የነበሩ ሌሎች ሹማምንቶችን አቁስሏል።
“The Emperor: Downfall of an Autocrat” በተሰኘው የሪቻርድ ሄይማን እና ክሪስቶፈር ፓይመንት መጽሐፍ ላይ እንደተገለጸው የፋሺስቱ ጦር ለሦስት ተከታታይ ቀናት በአዲስ አበባ ነዋሪዎች ላይ የጅምላ ጭፍጨፋ ፈጽሟል። በዚህ የግፍ ጊዜ ከ20 ሺህ እስከ 30 ሺህ የሚገመቱ ንጹሐን ኢትዮጵያውያን ጭካኔ በተሞላበት መንገድ ተገድለዋል።
ይህ ጥቁር ቀን ሁሌም በካቲት 12 በኢትዮጵያውያን ዘንድ የሰማዕታት መታሰቢያ ቀን ኾኖ ይዘከራል።የመታሰቢያው ሥነ ሥርዓትም በተለይም በአዲስ አበባ ስድስት ኪሎ በሚገኘው የየካቲት 12 ሰማዕታት ሐውልት ሥር ይታሰባል።
የጥበብ ባለውለታው ሰው!
የካቲት 16 ቀን 1928 ዓ.ም ደራሲ ዳኛቸው ወርቁ ተወለዱ። ዳኛቸው ወርቁ ደራሲነታቸው፣ የሥነ ጽሑፍ መምህርነታቸው፣ ገጣሚነታቸው እና የተውኔት ጸሐፊነታቸው በኢትዮጵያ የሥነ ጽሑፍ ታሪክ ውስጥ ትልቅ ቦታ እንዲይዙ አስችሏቸዋል።
በተለይም “አደፍርስ” የተሠኘው ልብ ወለድ ሥራቸው በሰፊው የሚታወቅ እና ተወዳጅ ነው። ይህ ልብ ወለድ በእውነተኛ ታሪክ ላይ የተመሠረተ ሲኾን በወቅቱ የነበረውን ማኅበራዊ እና ኢኮኖሚያዊ ሁኔታ በሥነ ጽሑፋዊ ለዛ የሚዳስስ ነው።
ዳኛቸው ወርቁ በዩኒቨርሲቲ ውስጥ ለረጅም ዓመታት በሥነ ጽሑፍ መምህርነት አገልግለዋል። በዚህ ወቅት ለብዙ ወጣት ደራሲያን እና ገጣሚያን መነሳሳት እና ድጋፍ በመኾን ትልቅ አስተዋጽኦ አበርክተዋል።
ዳኛቸው ወርቁ ግጥሞችንም ጽፈዋል። ግጥሞቻቸው በአብዛኛው ስለ ፍቅር፣ ተስፋ፣ ሀገር እና ማኅበራዊ ጉዳዮች ላይ ያተኩራሉ።
የዳኛቸው ግጥሞች ቀላል እና ግልጽ ቋንቋን የሚጠቀሙ ሲኾን፣ በውስጣቸው ጥልቅ እና አስተማሪ መልዕክት ያላቸውም ናቸው።
የዳኛቸው ወርቁ የሕይወት ታሪክ መጽሐፍ እንደሚያስረዳን ዳኛቸው ወርቁ ለኢትዮጵያ ቲያትር ዕድገትም አስተዋጽኦ አድርገዋል። በርካታ ተውኔቶችን በመጻፍ እና በማዘጋጀት የቲያትር ጥበብን ለማሳደግ ጥረት አድርገዋል።
ዳኛቸው ወርቁ በሕይዎት ዘመናቸው ለኢትዮጵያ ሥነ ጽሑፍ እና ኪነ ጥበብ ያበረከቱት አስተዋጽኦ ከፍተኛ ነው። ሥራዎቻቸው ለትውልድ የሚተላለፉ እና ሁሌም የሚታሰቡ ድንቅ ኢትዮጵያዊ ናቸው።
የሁለት ሃያላን ሀገራት የግንኙነት ጉዳይ!
የአሜሪካ እና የቻይና ግንኙነት ረጅም እና ውስብስብ ታሪክ ያለው ሲሆን በብዙ ውጣ ውረዶችን አልፏል።
ሁለቱ ሀገራት ግንኙነታቸው የሚጀምረው በታሪክ በዚህ ሳምንት ነበር። የአሜሪካ እና የቻይና ግንኙነት በ18ኛው ክፍለ ዘመን የጀመረው አሜሪካ ቻይናን እንደ ንግድ አጋር ስትመለከት ነበር።
ይሁን እንጂ በ20ኛው ክፍለ ዘመን ሁለቱ ሀገራት በቀዝቃዛው ጦርነት ወቅት የተለያዩ የፖለቲካ አመለካከቶች ስለነበሯቸው ግንኙነታቸው ሊቋረጥ ችሎ ነበር።
እ.ኤ.አ በ1972 ፕሬዝዳንት ሪቻርድ ኒክሰን ቻይናን በጎበኙበት ወቅት ግንኙነታቸው በድጋሚ ተጀመረ። ይህ ጉብኝት በሁለቱ ሀገራት መካከል የንግድ እና የባሕል ልውውጥ እንዲስፋፋ በር ከፍቷል።
በአሁኑ ጊዜ የአሜሪካ እና የቻይና ግንኙነት በብዙ ጉዳዮች ላይ የተመሠረተ ነው። በኢኮኖሚው ረገድ ቻይና የአሜሪካ ትልቅ የንግድ አጋር ስትኾን፣ አሜሪካ ደግሞ የቻይና ትልቅ የገበያ ቦታ ነች። ይሁን እንጂ በንግድ፣ በቴክኖሎጂ፣ በሰብዓዊ መብቶች እና በታይዋን ጉዳይ ላይ ያላቸው አመለካከት ይለያያል።
በቅርብ ዓመታት ውስጥ በሁለቱ ሀገራት መካከል ያለው ውጥረት እየጨመረ መጥቷል። አሜሪካ ቻይናን በንግድ ልምዶቿ፣ በቴክኖሎጂ ምዝበራ እና በሰብዓዊ መብቶች ላይ ትወቅሳታለች። ቻይና ደግሞ አሜሪካን በውስጣዊ ጉዳዮቿ ውስጥ ጣልቃ በመግባት እና የቻይናን ዕድገት ለማደናቀፍ ትሞክራለች ብላ ትከሳለች።
በምሥጋናው ብርሃኔ
የአሚኮ ዲጂታል ሚዲያ ቤተሰብ ይሁኑ!
👇👇👇
https://linktr.ee/AmharaMediaCorporation
ለኅብረተሰብ ለውጥ እንተጋለን!
