ከሦስት ዓመት በፊት የተከሰተው እና በየጊዜው ብቅ እያለ በሰብል ላይ ጉዳት የሚያደርሰውን ሁሉን አውዳሚ ተምች በመደበኛ ተባይነት ፈርጆ እየሠራ መሆኑን የአማራ ክልል ግብርና ቢሮ አስታወቀ፡፡

ሁሉን አውዳሚ ተምችን ለመከላከል ተባዩ በጊዚያዊነት ከሚከሰት ተባይነት ወጥቶ በመደበኛ ተባይ ተይዞ እንዲሠራ እየተደረገ እንደሆነም አስታውቀዋል፡፡
አሁን ላይ ተባዩ በቆሎ አምራች በሆኑ የክልሉ አካባቢዎች መከሰቱን ገልጸው በባህላዊው የመከላከል ዘዴ ለመቆጣጠር እየተሠራ እንደሆነ አስታውቀዋል፡፡
የክልሉ ግብርና ቢሮ ይህን ተባይ በዋናነት መከላከል የሚቻለው በባህላዊው እያሰሱ የመልቀምና የመግደል ዘዴ እንደሆነ የጠቀሱት ባለሙያው አንዳንድ በኩታ ገጠም የተዘሩ ሰብሎች ላይ ግን በኬሚካል ለመከላከል ጥረት እየተደረገ እንደሆነ ነው ያስታወቁት፡፡

የተከሰተው ተባይ በአንደኛው ዙር የመስኖ ማጠናቀቂያ በሁለተኛው ዙር የመስኖ ሥራ ጅማሮ ላይ በመሆኑ እስካሁን ጉዳት እንዳላደረሰም ነው ባለሙያው የገለጹት፡፡ ሁለተኛ ዙር የመስኖ ሰብል በሚደርስበት ግንቦት መጨረሻ እና ሰኔ ላይ ጉዳት እንዳያደርስ በተኩረት እየተሠራ መሆኑንም ተናግረዋል፡፡

ተባዩ ራሱን መሬት ላይ ቀብሮ የሚቆይ በመሆኑ ማሳን አዘውትሮ በማሰስ በባህላዊው የመልቀም ዘዴ ወዲያውኑ ማጥፋት ላይ ማተኮር እንደሚገባም መክረዋል፡፡

ችግሩ በሰፋባቸው ምዕራብ ጎጃም ዞን ሁለትጁን ነሴ ወረዳ፣ ሰሜን ወሎ ራያ ቆቦ ወረዳ እና ኦሮሞ ብሔረሰብ አስተዳደር አካባቢዎች ለመከላከል ቢሮው ጥረት እያደረገ መሆኑንም ነው የገለጹት፡፡

ዘጋቢ፡- ምሥጋናው ብርሃኔ