ባሕር ዳር የፀረ ተዋሲያን ኬሚካል ርጭት እያካሄደች ነው።

ለዚህም ተግባር በቂ የኬሚካል አቅርቦትና ርጭት የሚያካሂዱ ስድስት ተሽከርካሪዎች መዘጋጀታቸው ተነግሯል። የከተማዋ ነዋሪዎች የወረርሽኙን ስርጭት አሳሳቢነት በማጤን መንግሥት ያስተላለፈውን መመሪያ ተግባራዊ በማድረጋቸው ከንቲባው ምሥጋና አቅርበዋል። ‘‘የኬሚካል ርጭት ተካሂዷል’’ በሚል እሳቤ ነዋሪዎች ከቤት መውጣት እንደለሌባቸውም ዶክተር መሐሪ መልእክት አስተላልፈዋል።

የአማራ ክልል ውኃ መስኖና ኢነርጅ ልማት ቢሮ ኃላፊና የክልሉ የኮሮና ወረርሽኝ መከላከል የውኃ ግብረ ኃይል አባል ዶክተር ማማሩ አያሌው ደግሞ ወረርሽኙን ለመከላከል አማራጭ ከሆኑ ዘዴዎች መካካል የፀረ ተህዋሲያን ርጭት ማካሄድ አንዱ በመሆኑ ትኩረት ተሰጥቶት እየተሠራ እንደሚገኝ አስረድተዋል። የኮሮና ቫይረስ እንዳለባቸው የተጠረጠሩና የተገኙባቸው ሰዎች የታዩባቸው አካባቢዎች ርጭቱ ሲካሄድ የቆየ መሆኑንም ተናግረዋል። በቀጣይም በአራት የለይቶ የሕክምና ክትትል ማድረጊያዎች፣ በ23 ለበሽታው ተጋላጭ ወረዳዎችና በ5 የክልሉ ዋና ዋና ከተሞች ርጭት የሚካሄድ መሆኑንም ጠቁመዋል።

ዘጋቢ:- ኃይሉ ማሞ