ደብረ ማርቆስ ዩኒቨርሲቲ ኮሮና ቫይረስን ለመከላከል ጥንቃቄ እያደረገ መሆኑን አስታወቀ፡፡

አስተያዬታቸውን ለአብመድ የተናገሩ ተማሪዎችም ደኅንነታቸውን ለመጠበቅ ዩኒቨርሲቲው የወሰደውን እርምጃ ይደግፋሉ፡፡ ቫይረሱ ከሰው ወደ ሰው እንዳይተላለፍ ጤና ሚኒስቴር ያወጣቸውን መመሪያዎች እየተገበሩ ጥናታቸውንም እየቀጠሉ መሆናቸውን ተናግረዋል፡፡

ደብረ ማርቆስ ዩኒቨርስቲ የኮሮና ቫይረስን አስመልክቶ ተማሪዎች በቂ መረጃ አግኝተው የራሳቸውን ንጽህና እንዲጠብቁ ለማስቻል በበራሪ ወረቀቶችና መልዕክቶችን በመቅረጽ እያሰራጨ ነው፡፡ በመኪና እየዞሩ ስለ ወረርሽኙ ግንዛቤ እየፈጠሩ እንደሆነም አብመድ ታዝቧል፡፡ የዩኒቨርሲቲውን የማኅበረሰብ ኤፍ ኤም ሬድዮ በመጠቀምም መልእክት እየተላለፈ ነው፡፡

የዩኒቨርሲቲው የሕዝብ ግንኙነትና የኮሙኒኬሽን ዳይሬክተር ግርማው አሸብር እንደተናገሩትም የተማሪዎችን ደኅንነት በመጠበቅ የመማር ማስተማር ተግባሩን በሰላማዊ መንገድ ለማስቀጠል የሳይንስና ከፍተኛ ትምህርት ሚኒስቴር ባስቀመጠው አቅጣጫ መሠረት ኮሚቴ ተቋቁሞ በትኩረት እየተሠራ ነው፡፡ ተማሪዎች ከግቢ መውጣትም ሆነ መግባት እንደማይችሉ እና ከግቢ ውጭ የሚመገቡ ተማሪዎች እንዳይቸገሩ በግቢው ውስጥ ካፌ በማዘጋጀት እዚያው እንዲመገቡ አቅጣጫ መቀመጡንም ተናግረዋል፡፡

ወላጆችም ይህንን ተገንዝበው ስጋት ሳይገባቸው ለተግባራዊነቱ እንዲተባበሩ አቶ ግርማው ጠይቀዋል፡፡ ተማሪዎቹ ንጽህናቸውን የሚጠብቁበት ቁሳቁስ እየቀረበ ይገኛል፡፡ ይህም ሆኖ ወረርሽኙ ቢከሰት ወደ ሌሎች ተማሪዎች እንዳይዛመት የማቆያ ህንጻ መዘጋጀቱን ዳይሬክተሩ ተናግረዋል፡፡

ዘጋቢ፡-ሰለሞን ጥበቡ