ጠቅላይ ሚኒስትሩ በታገቱ የደምቢ ዶሎ ዩኒቨርሲቲ ተማሪዎች ጉዳይ ላይ ማብራሪያ እንዲሰጡ ዓለም አቀፍ የአማራ ኅብረት ጠየቀ፡፡

የተማሪ ወላጆችና ሕዝቡ እየተጨነቁ ባሉበት በዚህ ወቅት መንግሥት ዝምታን መምረጡ ተገቢነት የለውም ብሏል ኅብረቱ፡፡ ስለ ጉዳዩ ጠቅላይ ሚኒስትር ዐብይ አህመድ ማብራሪያ ሊሰጡ እንደሚገባም ጠይቋል፡፡

ጠቅላይ ሚኒስትሩ የሃገሪቱን ሠላምና ደህንነት በተመለከተ ወደ ውጭ ሃገራት ሄደው ትውልደ ኢትዮጵያውያንን ባነጋገሩበት ወቅት የገቡትን ቃል እንዲያከብሩ፣ የሰዎች ህይወት በከንቱ እንዲያልፍ አድርገዋል የተባሉ ግለሰቦችንም ተጠያቂ እንዲደርጉ ነው ኅብረቱ የተየቀው፡፡

መንግሥት ተማሪዎቹ ተለቅቀዋል ብሎ ከዚህ ቀደም መግለጫ ስለሰጠበት ጉዳይም በአደባባይ ለሕዝብ ማሳወቅ እንዳለበት አቶ ደህናሁን ተናግረዋል፡፡ ኅብረቱ በታገቱ ተማሪዎችና እየደረሱ ባሉ የሰብዓዊ መብት ጥሰቶች ዙሪያ በዋሽንግተን ዲሲ ትናንት ሲመክር መቆየቱንም አስታውቀዋል፡፡

ዓለም አቀፍ የአማራ ኅብረት በማኅበራዊ፣ ኢኮኖሚያዊ እና ፖለቲካዊ መስኮች የአማራን ሕዝብ ተጠቃሚ ለማድረግ ተበታትነው የሚሠሩ አካላት ወደ አንድ እንዲመጡና ጠንካራ ኅብረት እንዲፈጠር ያለመ የሲቪክ ኅብረት ነው፡፡

ዘጋቢ፡- ኃይሉ ማሞ