የአለቃ ገብረሃና ሊቅነትና ሌላ ገጽታ በ‹‹አራት ዐይና›› ትውፊታዊ ቴአትር እንዴት ተገለጸ?

ከራስ አሊ እስከ አፄ ቴዎድሮስ፣ ከአፄ ዮሃንስ እስከ እምየ ምንሊክ የአራት ነገስታት የፍርድ ምሰሶ፣ የፍትሃ ነገስት ሊቅ፣ የአቡሻከር ጠቢብ፣ የነገስታቱ አማካሪ እና የኋላ ቀር አስተሳሰብ ሞረድ የነበሩት አለቃ ገብረ ሃና ‹‹ከማያስተምሩህ ጋር አትዋል›› የሚለውን የመምህራቸውን አስተምህሮና ምክር አሻሽለው ‹‹የሰው ቀለም አትናቁ›› በሚል በዘመኑ ባልተለመደ መልኩ ለእውቀት ከፍ ያለ ዋጋ የሰጡ ሊቅ እንደነበሩ ትውፊታዊ ቴአትሩ ይዳስሳል፡፡

በምረቃ ስነ ስርዓቱ ላይ በክብር እንግድነት የተገኙት የደብረ ታቦር ዩኒቨርሲቲ ፕሬዝዳንት አነጋግሬ ጋሻው (ዶክተር) አለቃን ‹‹ከዘመናቸው በፊት የተፈጠሩ እና እውቀት የጠገቡ ሊቅ ነበሩ›› ብለዋቸዋል፡፡ ይህን ቴአትር ለተመልካች ለማድረስ እና መሰል የጥበብ ስራዎችን ለሚሰራው ሙሉ ዓለም የባህል ማዕከል ለማገዝ ዩኒቨርሲታቸው ዝግጁ መሆኑንም ተናግረዋል፡፡

በምረቃ ስነ ስርዓቱ ላይ ፀሃፊ ተውኔት አያልነህ ሙላቱ፣ ጌትነት እንየው፣ አበረ አዳሙ፣ የደብረ ታቦር ኢየሱስ ሊቃውንት፣ የተክሌ አቋቋም ተማሪዎች፣ የቴአትር ተማሪዎች፣ የአዲስ አበባ፣ የጎንደር እና የደብረ ታቦር ዩኒቨርሲቲ ምሁራን ተገኝተዋል፡፡

ዘጋቢ፡- ታዘብ አራጋው