የተፈናቀሉ ዜጎችን ወደ መኖሪያቸው ለመመለስ የሚያስችል እርቀ ሰላም እየተካሄደ ነው፡፡

የእርቀ ሰላም ኮንፈረንሱ በግጭት ምክንያት ከኖሩበት፣ ሃብት ካፈሩበትና ካደጉበት ቦታ ተፈናቅለው በየአካባቢው ተበታትነው ለችግር የተዳረጉ በርካታ የአማራ ተወላጆች ወደ ቀያቸው እንዲመለሱ ትልቅ እገዛ እንደሚደርግ ታምኗል፡፡ ከጃዊ እና አካባቢው ተፈናቅለው ለችግር የተዳረጉ የቤኔሻንጉል ጉምዝ ክልል ተወላጆችን መልሶ ለማቋቋም የሚኖረው ፋይዳም ከፍተኛ ነው ተብሏል በውይይቱ፡፡

በቤኔሻንጉል ጉሙዝ ክልል የሚፈጠሩ ግጭቶችን በዘላቂነት ለማስቆም የአማራ እና የቤኔሻንጉል ክልል መንግስታት እና ሕዝቦች በጋራ መስራት እንዳለባቸው በእርቀ ሠላም ኮንፈረንሱ ተጠይቋል፡፡ በሕዝብ መካከል ገብተው ግጭቶችን በመፍጠር የሚጠቀሙ ደላሎች መኖራቸውንና መንግስት ተጨባጭ እርምጃ አለመውሰዱ ችግሩን እንዳባባሰም ተሳታፊዎች ተናግረዋል፡፡ በተፈጠረው ችግር ምክንያትም በመተከል ዞን ሊለማ የሚችል ሰፊ መሬት አለመልማቱን ጠቁመዋል፡፡ ይህም ብዙዎቹን ለረሃብ የሚዳርግ በመሆኑ በአካባቢው ዘላቂ ሠላምን ማስፈን ጊዜ ሊሰጠው እንደማይገባ ነው ያሳሰቡት፡፡

አብመድ ያነጋገራቸው የሁለቱም ክልል የሥራ ኃላፊዎች ባለፈው በተከሰተው ግጭት ተሳታፊ ነበሩ የተባሉ መሪዎችን ጨምሮ እርምጃ መወሰዱን እና የአካባቢውን ሠላም በማስጠበቅ የተሻለ መስራት የሚችሉ መሪዎች መተካታቸውን ተናግረዋል፡፡ የተፈናቀሉ ዜጎችንም ወደ ቀያቸው ለመመለስ እና ለማቋቋም የሁለቱም ክልሎች በጋራ እየሰሩ መሆናቸውንም አብራርተዋል፡፡

በአንዳንድ አካባቢዎች የመጠለያ ግንባታው መጠናቀቁን የተናገሩት የሥራ ኃላፊዎቹ አሁንም በርካታ ዜጎች ተፈናቅለው በየቦታው ተበታትነው ለችግር የተጋለጡ በመሆኑ ድጋፍ ተደርጎላቸው መቋቋም የሚችሉበት ሁኔታ ጊዜ ሊሰጠው የማይገባ ጉዳይ መሆኑን ታዝበናል ነው ያሉት፡፡ ኅብረተሰቡም በሕዝቦች መካከል ግጭቶችን በመፍጠር ለሚያተርፉ አካላት መጠቀሚያ ከመሆን እንዲቆጠብ እና ሁኔታዎችን በአስተውሎት ሊያይ እንደሚገባ አሳስበዋል፡፡

ዘጋቢ፡- አብዮት ከፋለ