በአማራ ክልል የተጀመሩ የጤና ተቋማት ግንባታዎች በተያዘላቸው ጊዜ አለመጠናቀቃቸውን የክልሉ ምክር ቤት የሰው ሃብት እና ቱሪዝም ልማት ጉዳዮች ቋሚ ኮሚቴ ገለጸ፡፡

የቋሚ ኮሚቴው ሰብሳቢ የተከበሩ ወይዘሮ አበራሽ ታደሰ ግንባታዎች በተያዘላቸው ጊዜ እንዲጠናቀቁ አቅጣጫ የተቀመጠ ቢኾንም የአፈጻጸም ተግዳሮት ገጥሟቸዋል ሲሉ ለምክር ቤቱ ተናግረዋል። ወይዘሮ አበራሽ ግንባታውን በተቋራጭነት የወሰዱ አካላት በሙሉ አቅም ወደ ሥራ አለመግባት እና አንዳንዶችም በቦታው አለመገኘታቸው ለሥራው መጓተት ምክንያቶች መኾናቸውን በመስክ ምልከታ አረጋግጠናል ነው ያሉት። የተቋማቱ ግንባታ መጓተት የኅብረተሰቡን ጤና ጫና ውስጥ ከመክተቱም ባለፈ የመልካም አሥተዳደር ጥያቄን እያስነሳ ስለመኾኑም አብራርተዋል።

ግንባታቸው የተጀመሩ የጤና ተቋማት በአጭር ጊዜ ተጠናቅቀው ለኅብረተሰቡ ጤና መሻሻል ግብዓት እንዲኾኑ በትኩረት መሠራት እንዳለበትም ተናግረዋል። ቋሚ ኮሚቴው ተከታታይ ክትትልና ቁጥጥር እንደሚያደርግም የተከበሩ ወይዘሮ አበራሽ ገልጸዋል።

ዘጋቢ:- አሚናዳብ አራጋው

ለኅብረተሰብ ለውጥ እንተጋለን!