በአሜሪካ ሀገር የሚኖሩ የጎንደርና የአከባቢው ተወላጆች በዋግ ኽምራ ብሔረሰብ አሥተዳደር ለቅዳሚት አንደኛ ደረጃ ትምህርት ቤት የግብዓት ድጋፍ አደረጉ፡፡

ድጋፉን ይዘው የመጡት አቶ አብልኝ ሙሉ አሜሪካ ሀገር የሚኖሩ ትውልደ ኢትዮጵያዊያን 900 ሺህ ብር ወጭ በማድረግ 150 የተማሪዎች መማርያ ወንበር ድጋፍ አድርገናል ብለዋል።

በዋግ ኽምራ አካባቢ በጦርነቱ መጠነ ሰፊ ጉዳት የደረሰ በመኾኑ ቀጣይነት ያለው ድጋፍ እንደሚያደርጉም ተናግረዋል።

የዋግኽምራ ብሔረሰብ አሥተዳደር የትምህርት መምሪያ ባለሙያ አቶ ወንድሙ አየነው ዋግ የጦርነቱ ዋና አውድማ በመኾኗ ምክንያት በርካታ ትምህርት ቤቶች መውደማቸውን በመግለጽ የጎንደር አካባቢ ዲያስፖራዎች ላደረጉት ድጋፍ አመስግነዋል፡፡ ችግሩ ሰፊ በመኾኑ ሌሎች ኢትዮጵያዊያንም ድጋፍ እንዲያደርጉ ጥሪ አቅርበዋል።

የዋግ ልማት ማኅበር ዋና ዳይሬክተር ባምላኩ አለቤ ለተደረገው ድጋፍ አመስግነው ዋግ በጦርነቱ በሁሉም ዘርፍ በሁሉም ወረዳዎች ሰፊ ጉዳትና ውድመት የደረሰ በመኾኑ ሁሉም የበኩሉን እንዲደግፍ ጠይቀዋል።

ዘጋቢ፡- ሰሎሞን ደሴ

ለኅብረተሰብ ለውጥ እንተጋለን