ቅዳሜ፣ እሑድ እና በበዓል ቀናት ማንኛውም የጭነት ተሽከርካሪ ያለምንም የሰዓት ገደብ ወደ ከተማዋ መግባትና መንቀሳቀስ እንዲችል ማሻሻያ ተደረገ፡፡

በተሻሻለው መመሪያ መሠረትም ማንኛውም የከባድ ጭነት ተሽከርካሪ ከጠዋቱ 12፡30 እስከ 4፡00 እና ከቀኑ 10፡00 እስከ ምሽቱ 2፡00 ካለው ጊዜ ውጪ መንቀሳቀስ የሚፈቅድ መሆኑን ገልጸዋል፡፡ በዚህም መሠረት የከባድ ጭነት ማሽነሪዎችና ተሽከርካሪዎች ከጠዋቱ 4፡00 እስከ ቀኑ 10፡00 ድረስ በከተማዋ ውስጥ መዘዋወርና ማንኛውንም አገልግሎት መስጠት እንደሚችሉ ጠቁመዋል፡፡

ከዚህ ባለፈ ቅዳሜ፣ እሑድ እና በበዓል ቀናት ማንኛውም የጭነት ተሽከርካሪ ያለምንም የሰዓት ገደብ መንቀሳቀስ እንዲሁም ዕቃ መጫንና ማራገፍ እንደሚችሉ ኢንጂነር ጅሬኛ ተናግረዋል፡፡

በመሆኑም የከተማዋ ትራፊክ ፖሊስና የደንብና ቁጥጥር አካላት የተደረገውን ማሻሻያ በመረዳት እንደወትሮው ጥብቅ ቁጥጥር በማድረግ በከተማዋ ውስጥ ሠላማዊና ምቹ የትራፊክ እንቅስቃሴ እንዲኖር ጥረት እንዲያደርጉ ዋና ዳሬክተሩ መልዕክት ማስተላለፋቸውን አዲስ ዘመን ዘግቧል፡፡

ኤጄንሲው የመንገድ አጠቃቀም ሥርዓትን የሚያሻሽል የጭነት፣ የማሽነሪዎችና መሰል ተሽከርካሪዎች እንቅስቃሴ ለመወሰን የወጣውን መመሪያ ቁጥር 03/2011 መነሻ በማድረግ በከተማዋ የጭነት ተሽከርካሪዎች የሚፈጥሩትን ተፅዕኖ ለመቀነስ መመሪያ አዘጋጅቶ ከሰኔ 30/2011 ዓ.ም ጀምሮ በተግባር ላይ ማዋሉ ይታወሳል፡፡