የመስቀል ደመራ በዓል በኬንያ ናይሮቢ ተከብሯል፤ ኢትዮጵያውያን ተደጋግፈው ለሀገር ልማት እንዲቆሙም ጥሪ ተላልፏል፡፡

ኢትዮጵያ በዚህ ወቅት የጀመረችውን አዲስ የለውጥ ጉዞ ለማስቀጠል ለሀገራዊ ሠላም፣ እርቅና አንድነት በኬንያ የሚኖሩ ኢትዮጵያውያንና ትውልደ ኢትዮጵያውያን በጋራ ሊቆሙ እንደሚገባም ነው አምባሳደር መለስ ያሳሰቡት፡፡

‹‹እጅ ለእጅ ተያይዘን በመደጋገፍና በኅብረት ከድህነት ተላቅቃ ዜጎቿ በእኩልነትና በነፃነት የሚኖሩባትን ታሪከ ገናናዋን ኢትዮጵያን ለመፍጠርም እያንዳንዱ ዜጋ ሀገራዊ ኃላፊነት አለበት፡፡ ታላቋን ኢትዮጵያን ለመፍጠር በጋራ ተደጋግፈን መሥራት ያስፈልጋል›› ብለዋል አምባሳደር መለስ በመልዕክታቸው።

በናይሮቢ የሚኖሩ የኢትዮጵያውያን ማኅበረሰብ አባላት ከዚህ በፊት ለታላቁ ሕዳሴ ግድብ ግንባታ ቦንድ በመግዛትና የዲያስፖራ ትረስት ፈንድ የኬንያ ‹ቻፕተር›ን በማቋቋም ላበረከቱት አስተዋዕኦ አምባሳደር መለስ ምሥጋና አቅርበዋል፡፡

በዚህ ወቅት በኢትዮጵያ እየተካሄደ ያለውን ለውጥ ለማሳካትም በዕውቀት ሽግግር እና ሀብታቸውን በሀገራዊ ልማት ፈሰስ በማድረግ እገዛ እንዲያደርጉም ጥሪ አቅርበውላቸል።

የመስቀል በዓል ኢትዮጵያ ለዓለም ስልጣኔ ካበረከተቻቸውና በተባበሩት መንግሥታት ድርጅት የሳይንስ፣ ባሕልና ትምህርት ድርጅት (ዩኔስኮ) ካስመዘገበቻቸው የማይጨበጡ ቅርሶች መካከል አንዱ ነው።

ምንጭ፡- በኬንያ የኢትዮጵያ ኤምባሲ