በአማራ ክልል አራት ዞኖች የተቀናጀ የግብርናና ገጠር ልማት የመንደር ንቅናቄ የሙከራ ትግበራ ላይ መሆኑ ተገለፀ፡፡

በኮሪያ መንግሥት እና በአማራ ክልል የተቀናጀ የገጠር ልማት ስትራቴጂ እና ሞዴል ማማከር ፕሮጀክት ከፍተኛ የእንስሳት ባለሙያው አቶ ሳሙኤል ይማም ፕሮጀክቱ የሥነ አመጋገብ ችግርን ለመፍታት፣ ለሥነ ምኅዳር ጥበቃ፣ ለሥራ ዕድል ፈጠራ እና አማራጭ የገቢ ምንጭ ሆኖ እንዲያገለግል ታስቦ የተቀረፀ መሆኑን ተናግረዋል፡፡

‹‹የሙከራ ትግበራ ሂደቱ በአማራ ክልል በአራት ዞኖች ውስጥ ባሉ አራት ወረዳዎች እና ስድስት ቀበሌዎች ውስጥ ባሉ 20 መንደሮች እየተተገበረ ይገኛል›› ተብሏል፡፡ የሙከራ ትግበራ ከሚፈፀምባቸው ዞኖች ውስጥ ደቡብ ጎንደር አንዱ ነው፡፡ በዚሁ ዞን ውስጥ በደራ ወረዳ ወንጪት ቀበሌ ውስጥ 22 ግሪን ሃውስ፣ 23 ባዮ ጋዝ፣ 33 የዶሮ እርባታ እና በርካታ የተቀናጁ የጓሮ አትክልት እና የዓሳ እርባታ በፕሮጀክቱ ሙከራ እየተተገበረ ይገኛል፡፡ አርሶ አደሮቹ አማራጭ የውኃ አቅርቦት፣ ሙያዊ እና የቁሳቁስ ድጋፍም ተደርጎላቸዋል ተብሏል፡፡

በክልሉ በሚገኙ ዞኖች እና ወረዳዎች በባሕር ዳር ተሰባስበው የሚመክሩት የአዴፓ አባላት እና ከፍተኛ መሪዎች ዛሬ ጠዋት በደራ ወረዳ ወንጪት ቀበሌ ተገኝተው የፕሮጀክቱን የትግበራ ሁኔታ ጎብኝተዋል፡፡ ከሰሜን ሽዋ ዞን የመጡት የእንሳሮ ወረዳ ዋና አስተዳዳሪ አቶ ደምሰው መንበሩ ያዩትን እንደ ወረዳቸው ተጨባጭ ሁኔታ ተግባራዊ ለማድረግ እና ለማስፋት ማሰባቸውንም ለአብመድ ተናግረዋል፡፡

ዘጋቢ፡- ታዘብ አራጋው