“የክልሉ መንግሥት ያቀረበውን የክተት ጥሪ በመቀበል የህልውና ዘመቻውን ለመቀላቀል ተዘጋጅተናል” የፍኖተ ሰላም ወጣቶች

ወጣት ማተቤ መላኩ አሸባሪውን የትህነግ ቡድንን ለመደምሰስ ከክልሉ መንግሥት ጎን በመቆም የህልውና ዘመቻውን ለመቀላቀል መወሰኑን ነግሮናል፡፡ ትህነግ የአማራን ወጣት በተለያየ መንገድ አንገት እንዲደፋ ሲያደርግ መቆየቱን ገልጿል፡፡ ይህ የግፍ አገዛዝ እንዳይመለስ አሸባሪውን ለመደምሰስ በሚደረገው ዘመቻ ለመሳተፍ መወሰኑንም አብራርቷል፡፡

የክተት ጥሪውን ለመቀላቀል ወደ ማእከል ካመሩት ወጣቶች መካከል ሌላኛው ወጣት መንግሥቱ ዓለማየሁ “እኛ የአባቶቻችን ልጆች ነን፤አባቶቻችን የሀገር ፍቅርን በተግባር እያስተማሩ አሳድገውናል፤የኢትዮጵያን አንድነት ለማስቀጠል በህልውናችን ላይ የመጣውን አሸባሪ ቡድን ለማጥፋት ሁሉም በአንድነት ሊቆም ይገባል” ብሏል።

“ወጣቶች የውስጥ ችግሮቻችንን ወደ ጎን በመተው አሁን በህልውናችን ላይ የተጋረጠብንን ጠላታችንን ለመደምሰስ በአንድነት የምንቆምበት ጊዜ ላይ ነን” ያለው ሌላኛው ዘማች ወጣት ፍሬው ስማቸው ነው። አማራ ከሌሎች ኢትዮጵያውያን ጋር ሆኖ ይህንን አሸባሪ ቡድን ማጥፋት አለበትም ብሏል::

የገጠመንን የህልውና አደጋ ምክንያት በማድረግ እንዲሁም የክልሉ መንግሥት ያቀረበውን የክተት ጥሪ በመቀበል ሕዝቡ በተለይም ወጣቱ ከፍተኛ እንቅስቃሴ ውስጥ መኾኑን የምዕራብ ጎጃም ዞን የሰላምና ሕዝብ ደኅንነት ጉዳዮች መምሪያ ተወካይ ኀላፊ አለልኝ አሰፋ ተናግረዋል፡፡

አቶ አለልኝ ወጣቱ ስልጠና በመውሰድ የህልውና ዘመቻውን ለመቀላቀል በየቀበሌ ማዕከል በመመዝገብ ላይ ነው ብለዋል፡፡ በዚህም በዞኑ በ453 ቀበሌዎች ምዝገባ በማካሄድ ወደ ስልጠና መገባቱን አስታውቀዋል፡፡

ወጣቱ በጦር ግንባር መሰለፍ ብቻም ሳይኾን ሰርጎ ገብ እንዳይኖር አካባቢውን በንቃት እንዲጠብቅ የሚያስችል ወታደራዊ ስልጠና በየቀበሌ ማዕከላት መሰጠት መጀመሩንም ተናግረዋል።

ዘጋቢ፡- ዘመኑ ይርጋ – ከፍኖተ ሰላም

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡
ዩቱዩብ https://bit.ly/2RnNHCq
በዌብሳይት amharaweb.com
በቴሌግራም https://bit.ly/2wdQpiZ
ትዊተር https://bit.ly/37m6a4m