ክልሉን ከማናቸውም ጥቃት ለመመከት አስፈላጊው ዝግጅት መደረጉን ርእሰ መሥተዳድር አገኘሁ ተሻገር አስታወቁ፡፡

ባሕር ዳር፡ ሰኔ 29/2013 ዓ.ም (አሚኮ) የአማራ ክልል ርእሰ መሥተዳድር አገኘሁ ተሻገር መግለጫ ሰጥተዋል፡፡ በመግለጫቸውም የአማራ ሕዝብ የሕግ ማስከበር ዘመቻው ውጤታማ እንዲሆን መሥራቱንም ገልጸዋል።

የፌዴራል መንግሥት በትግራይ ክልል የወሰነው ውሳኔ በክልሉ መንግሥት እንደሚደገፍም አስታውቀዋል።

የአማራ ሕዝብና መንግሥት ለመከላከያ ደጀን መሆኑን አሳይቷል ፤ እያሳየም ይገኛል። ይህን አጠናክረን እንቀጥላለንም ነው ያሉት።

ክልሉን ከማናቸውም ጥቃት ለመመከት አስፈላጊውን ዝግጅት አድርገን እየሠራን ነውም ብለዋል።

የሕግ ማስከበር ዘመቻው ለአሸባሪው ትህነግ ዋጋውን የሠጠና የደመሰሰ ነውም ብለዋል። አሸባሪው ትህነግ እዚህ ግባ የሚባል ተፅዕኖ አያደርስምም ነው ያሉት። የአሸባሪው ትህነግ ዓላማ የተዳከመ የመከላከያ ሠራዊት እንዲፈጠር ማድረግ ነው ያሉት ርእሰ መሥተዳድሩ ለወራት የዘለቀው የሕግ ማስከበር ዘመቻ በድል የተጠናቀቀ ነውም ብለዋል። መንግሥት በአሸናፊነት ላይ ኾኖ ያወጀው የተኩስ አቁም መሆኑን አስታውቀዋል።

ርእሰ መሥተዳድሩ የአሸባሪው ትህነግ ቡድን የቻለውን በደል ኹሉ በአማራ ሕዝብ ላይ ፈፅሟል ነው ያሉት።

የአማራ ሕዝብና የጸጥታ ኃይሉ የአሸባሪውን ትህነግ ተስፋፊነት መግታቱን አስታውቀዋል።

አሸባሪው ትህነግ ሂሳብ የሚያወራርድበት እና ቆሞ የሚጠብቅ ሕዝብ የለም ያሉት ርእሰ መሥተዳድሩ እኛ በማንም ሕዝብ ላይ ሂሳብ አናወራርድም፤ እናወራርዳለን ብለን አልተነሳምን፣ የሚመጣ ካለ ግን ዝግጁ ነን ብለዋል።

ከአሸባሪው ትህነግ የሚመጣውን ጥቃት ለመመከት ብቃትም ችሎታውም አለን ነው ያሉት።

የአማራ ሕዝብ በሥነ ልቦና ዝግጁ መሆኑን የገለጹት ርእሰ መሥተዳድሩ ወጣቱ፣ ሚሊሻውና ልዩ ኃይሉ መዘጋጀቱንም ተናግረዋል።

ክልሉ አሁን ላይ መደበኛ የልማት እና የመልካም አስተዳደር ሥራዎችን እየሠራ መሆኑንም አስታውቀዋል።

ዘጋቢ:- ታርቆ ክንዴ

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

ዩቱዩብ https://bit.ly/2HYJBLZ

በዌብሳይት www.amharaweb.com

በቴሌግራም https://bit.ly/2wdQpiZ

ትዊተር https://bit.ly/37m6a4m