በተለያዩ የሀገሪቱ ክፍሎች በአማራ ህዝብ ላይ ጥቃት በሚፈጽሙ አካላት ላይ ድርጊታቸውን የሚመጥን እርምጃ መንግስት አለመውሰዱን የአዲስ አበባ ከተማ ነዋሪወች ተናገሩ፤ መንግስት ሕግ የማስከበርና የሕዝብን ደኅንነት የመጠበቅ ኃላፊነቱን መወጣት ይገባዋልም ብለዋል፡፡

ባሕር ዳር፡ ጥቅምት 24/2013 ዓ.ም (አብመድ) እሁድ ጥቅምት 22 ቀን 2013 ዓ.ም በኦሮሚያ ክልል ምዕራብ ወለጋ ዞን ጉሊሶ ወረዳ ጋዋ ጋንቃ ቀበሌ በሚኖሩ ንፁኃን አማራዎች የጅምላ ጭፍጨፋ ተፈጽሟል፡፡ ለደረሰው ዘር ተኮር ጥቃት መንግሥት አሁንም አገር ውስጥ ትጥቅ አንግቦ የሚንቀሳቀሰውን የኦነግ ሸኔ ታጣቂ ቡድን እና ህውሀትን ከመውቀስ አልወጣም፡፡ በዚህም አማራ ላይ ያነጣጠሩ ግድያወች መቀጠላቸውንና ሀገርን ዋጋ እያስከፈለ እንደሚገኝ ከአብመድ ጋር ቆይታ ያደረጉት የአዲስ አበባ ከተማ ነዋሪዎች ተናግረዋል፡፡