የአንበጣ መንጋና የጎርፍ አደጋ ያስከተሉትን የምርት መቀነስ በመስኖ እርሻ ለማካካስ ቅድመ ዝግጅት ማድረጉን የአማራ ክልል ግብርና ቢሮ አስታወቀ፡፡

ባሕር ዳር፡ ጥቅምት 13/2013 (አብመድ) በአማራ ክልል ግብርና ቢሮ የአትክልትና ፍራፍሬ ዳይሬክቶሬት የአትክልት ባለሙያ ተፈራ ሰይፉ እንደተናገሩት በ2013 ዓ.ም የመስኖ እርሻ 248 ሺህ ሄክታር ማሳ በዘር ይሸፈናል፡፡ በመስኖ እርሻ ልማት 1 ነጥብ 2 ሚሊዮን አርሶ አደሮች በመሳተፍ 37 ነጥብ 7 ሚሊዮን ኩንታል ምርት ለማገኘት እቅድ እንደተያዘም ነው የተናገሩት፡፡ አርሶ አደሮች ገበያ ተኮር ሰብሎች ላይ ትኩረት በማድርግ የመስኖ ስራቸውን እንዲያከናውኑ አቅጣጫ ተይዟል ያሉት አቶ ተፈራ 80 በመቶ የሚሆን ማሳ በአተክልትና ፍራፍሬ እንደሚሸፈን አስረድተዋል፡፡

በቆላማ አካባቢዎች ላይም የቆላ ስንዴ ለመዝራት ቅድመ ዝግጅት ተደርጓል፤ ለመስኖ እርሻ በቂ ግባት መኖሩንም አቶ ተፈራ አርጋግጠዋል፡፡ እየተደረገ ያለው ቅድመ ዝግጅት በአንበጣ መንጋና በጎርፍ አደጋ የወደመውን ሰብል ማካካስ የሚያስችል እንደሆነም ገልጸዋል፡፡